საქართველოს მთავრობის განკარგულება №773
05 დეკემბერი, 2007
ღვინის ქარხნების ფინანსური მხარდაჭერის მიზნით საქართველოს მთავრობის სარეზერვო ფონდიდან სესხის გამოყოფის შესახებ
მოსახლეობის მიერ ღვინის ქარხნებისათვის ჩაბარებული ყურძნის ღირებულების სრულად და მიმდინარე წლის ბოლომდე ანაზღაურების ხელშეწყობის მიზნით:
1. საქართველოს ფინანსთა სამინისტრომ (ნ. გილაური) ,,საქართველოს 2007 წლის სახელმწიფო ბიუჯეტის შესახებ" საქართველოს კანონით გათვალისწინებული საქართველოს მთავრობის სარეზერვო ფონდიდან საქართველოს სოფლის მეურნეობის სამინისტროს საჯარო სამართლის იურიდიულ პირს - ვაზისა და ღვინის დეპარტამენტ ,,სამტრესტს" (ვ. მანაგაძე) სახელმწიფო მიზნობრივი პროგრამა ,,ღვინის ქარხნების ფინანსური მხარდაჭერის ღონისძიებების" დასაფინანსებლად საკრედიტო რესურსად გამოუყოს 1 000 000 (ერთი მილიონი) ლარი.
2. საქართველოს ფინანსთა სამინისტრომ სოფლის მეურნეობის სამინისტროს წინადადების საფუძველზე შეიტანოს შესაბამისი ცვლილებები 2007 წლის სახელმწიფო ბიუჯეტის კვარტალურ განწერაში.
3. საქართველოს სოფლის მეურნეობის სამინისტრომ (პ. ცისკარიშვილი) უზრუნველყოს:
ა) სესხის მიმღები ღვინის ქარხნების შერჩევა და მათთვის საკრედიტო რესურსად გამოყოფილი თანხის სესხის სახით გაცემა;
ბ) საქართველოს ფინანსთა სამინისტროსთან და საჯარო სამართლის იურიდიულ პირთან - ვაზისა და ღვინის დეპარტამენტ ,,სამტრესტთან" ერთად შერჩეულ სესხის მიმღებ ღვინის ქარხნებთან სასესხო ხელშეკრულებების გაფორმება.
4. სესხით სარგებლობის ვადად განისაზღვროს 1 წელი სასესხო ხელშეკრულების ხელმოწერის დღიდან.
5. სესხით სარგებლობისათვის წლიური საპროცენტო განაკვეთი განისაზღვროს 3 პროცენტის ოდენობით.
6. დადგენილ ვადებში სესხისა და მასზე დარიცხული სარგებლის დაბრუნების უზრუნველყოფის მიზნით სასესხო ხელშეკრულების ხელმოწერის დღიდან ორი კვირის ვადაში სესხის მიმღებმა ღვინის ქარხნებმა საქართველოს ფინანსთა სამინისტროს წარუდ-გინონ შესაბამისი საბანკო გარანტია ან დააგირაონ და იპოთეკით დატვირთონ შესაბამისი ღირებულების ქონება.
7. გამოყოფილი სესხის მიზნობრივი გამოყენების კონტროლი განახორციელოს საქართველოს სოფლის მეურნეობის სამინისტრომ. სესხის მიმღებ ღვინის ქარხნებს სესხის არამიზნობრივად გამოყენების შემთხვევაში დაეკისროთ პირგასამტეხლო არამიზნობრი-ვად გამოყენებული თანხის 25 პროცენტის ოდენობით.
8. განკარგულების შესრულების კონტროლი განახორციელონ საქართველოს ფინანსთა მინისტრმა ნ. გილაურმა და სოფლის მეურნეობის მინისტრმა პ. ცისკარიშვილმა.
9. განკარგულება ძალაშია ხელმოწერის დღიდან.
ვიცე-პრემიერი გიორგი ბარამიძე