2007 წლის 20 ივნისს გაიმართა საქართველოს მთავრობის სხდომა. დღის წესრიგში შეტანილი იყო 31 საკითხი. დღის წესრიგი
სხდომის დაწყებისას საქართველოს პრემიერ-მინისტრმა ზურაბ ნოღაიდელმა მთავრობის წევრებს მიაწოდა ინფორმაცია მიმდინარე წლის პირველი კვარტალის საბოლოო შედეგების შესახებ. მან აღნიშნა, რომ პირველ კვარტალში მთლიანი შიდა პროდუქტის ზრდის რეალურმა მაჩვენებელმა 11,4% შეადგინა და იმედი გამოხატა, რომ ტემპები გაიზრდება, ორნიშნა მაჩვენებელი შენარჩუნებული იქნება და წლის განმავლობაში იგი 12-15%-ს შეადგენს. მან თქვა, რომ წლის ბოლოს საქართველოში ნომინალური შიდა პროდუქ-ტი 2300 დოლარს მიაღწევს და 5000 დოლარზე მეტი იქნება ე.წ. PPP-ს მაჩვენებელი. ეს ძალზე მნიშვნელოვანია ქვეყნის ეკონომიკის განვითარებისათვის, ახალი სამუშაო ადგილების შექმნისა და ჩვენ წინაშე არსებული პრობლემების მოგვარებისათვის. "ჩვენ ვმუშაობთ საქართველოს ეკონომიკის შემდგომ სტრუქტურულ რეფორმირებაზე, მისი განვითარებისათვის სხვა საფუძვლების ჩამოყალიბებაზე, ახალი სამუშაო ადგილების შექმნაზე. ვვარაუდობთ, რომ წელს საქართველოს ეკონომიკაში შეიქმნება დამატებით 90 ათასი სამუშაო ადგილი", - დასძინა საქართველოს პრემიერ-მინისტრმა.
საქართველოს მთავრობის კანცელარიის პრესცენტრი