2007 წლის 16 აგვისტოს გაიმართა საქართველოს მთავრობის სხდომა. დღის წესრიგში შეტანილი იყო 44 საკითხი. დღის წესრიგი
სხდომის დაწყებისას საქართველოს პრემიერ-მინისტრმა ზურაბ ნოღაიდელმა მთავრობის წევრებს აცნობა, რომ საერთაშორისო ექსპერტთა ჯგუფმა დაამთავრა მუშაობა 6 აგვისტოს საქართველოს საჰაერო სივრცის დარღვევისა და სოფელ წითელუბანთან რაკეტის ჩამოგდების ინციდენტის გამოძიებასთან დაკავშირებით და სთხოვა საქართველოს საგარეო საქმეთა მინისტრს გელა ბეჟუაშვილს მთავრობის წევრების ინფორმირება ჯგუფის მიერ მომზადებული ანგარიშის თაობაზე.
საქართველოს საგარეო საქმეთა მინისტრმა გელა ბეჟუაშვილმა დამსწრეთ აცნობა, რომ გუშინ, 6 აგვისტოს ინციდენტის გარემოებათა შემსწავლელმა საერთაშორისო ექსპერტთა ჯგუფმა, რომლის მუშაობაში მონაწილეობდნენ ამერიკის შეერთებული შტატების, შვედეთის, ლიტვის და ლატვიის ექსპერტები შვედი ექსპერტის ხელმძღვანელობით, წარმოადგინა ანგარიში, რომლითაც დასტურდება აღნიშნულ ინციდენტთან დაკავშირებული ყველა ის მტკიცებულება, რომლებიც ქართულმა მხარემ მოიპოვა გამოძიების პირველსავე დღეს. მან მადლობა გადაუხადა ამ ქვეყნების ექსპერტებს გაწეული მუშაობისათვის და აღნიშნა, რომ დღეს ასევე ველოდებით ექსპერტებს დიდი ბრიტანეთიდან, საფრანგეთიდან, ესტონეთიდან. ძალზე მნიშვნელოვანია, რომ ეუთოს თავმჯდომარემ, ესპანეთის საგარეო საქმეთა მინისტრმა ამ ინციდენტის გამოსაძიებლად დანიშნა საკუთარი წარმომადგენელი, რომელიც ამ კვირის ბოლოს ჩამოვა საქართველოში. ასევე მნიშვნელოვანია, რომ ამ ინციდენტთან დაკავშირებით საკუთარი პოზიციები გამოთქვეს ევროკავშირმა და სხვა საერთაშორისო ორგანიზაციებმა. დღეს, გაეროში, სამშვიდობო ოპერაციების დეპარტამენტი უშიშროების საბჭოს სხდომას მოახსენებს ამ ფაქტის დეტალებს, რომლებიც ეყრდნობა დამოუკიდებელ ექსპერტთა ანგარიშს და ეუთოს ექსპერტების შუალედურ ანგარიშს. ჩვენ ვაგრძელებთ მუშაობას, თქვა მინისტრმა, რათა ნათელი მოვფინოთ ყოველივეს, რაც 6 აგვისტოს მოხდა. ამ ფაქტს ჩვენ განვიხილავთ როგორც წინა ინციდენტების გაგრძელებას, რაც საჭიროებს საერთაშორისო თანამეგობრობის სერიოზულ ყურადღებას. ეს არის გზავნილი ჩვენი პარტნიორებისათვის.საქართველოს საგარეო საქმეთა მინისტრმა ასევე აღნიშნა, რომ დღეს, ჩვენი მოწვევით საქართველოში ჩამოვიდა საკმაოდ დიდი წარმომადგენლობითი ჯგუფი რუსეთის ფედერაციიდან, რომელსაც ხელმძღვანელობს საჰაერო ძალების შტაბის უფროსი. ეს სწორედ ის პიროვნებაა, რომელმაც ინციდენტის დღეს უარყო იმ დღეებში რუსეთის ტერიტორიაზე სამხედრო-საჰაერო ძალების წვრთნების გამართვის ფაქტი, რაც ტყუილი აღმოჩნდა, რადგან 15 აგვისტოს რუსეთის თავდაცვის სამინისტროს ვებ-გვერდზე გამოქვეყნდა ინფორმაცია, რომ ასეთი წვრთნები გაიმართა და რა ტიპის თვითმფრინავები, როგორი აღჭურვილობით იღებდნენ მასში მონაწილეობას. ჩვენ ღია ვართ თანამშრომლობისათვის, თქვა მინისტრმა და იმედი გამოხატა, რომ რუსეთის ექსპერტებთან კონსულტაციების შემდეგ მრავალ კითხვას გაეცემა პასუხი.
საქართველოს საგარეო საქმეთა მინისტრმა გელა ბეჟუაშვილმა მადლობა გადაუხადა საქართველოს შინაგან საქმეთა სამინისტროს, თავდაცვის სამინისტროს, სხვა უწყებებს აღნიშნული ინციდენტის გარემოებათა გამოძიების დროს კოორდინირებული, შეთანხმებული და ეფექტიანი საქმიანობისათვის, თუმცა აღნიშნა, რომ ასეთი სიტუაციის მართვის პროცედურები დასახვეწია, რაც წარმოჩინდა ამ დღეების განმავლობაში.
საქართველოს შინაგან საქმეთა მინისტრმა ივანე მერაბიშვილმა განაცხადა, რომ სამინისტროში შექმნილმა კომისიამ ასევე დაამთავრა მუშაობა 6 აგვისტოს ინციდენტის გარემოებათა გამოძიებაზე და მოამზადა დასკვნა, რომელიც გამოქვეყნდება მას შემდეგ, რაც ყველა ექსპერტი დაასრულებს მუშაობას. მინისტრმა თქვა, რომ კომისიამ მოიპოვა 600-მდე მტკიცებულება, შეგროვებულია ჩამოგდებული რაკეტის 8000-ზე მეტი დეტალი, დაფიქსირებულია რადარების ჩვენებები, სატელეფონო საუბრები დისპეტჩერებს შორის, ჩამორთმეულია თვითმხილველთა ჩვენებები. ჩვენი დასკვნით, თქვა მინისტრმა, ეს იყო რადარის საწინააღმდეგო რუსული რაკეტა. თვითმფრინავი ჩვენი რადარის უშუალო სიახლოვეს მივიდა და მოხდა რაკეტის ავარიული ჩამოგდება, ავარიული მოცილება თვითმფრინავიდან. ამ დასკვნას ეთანხმება ყველა ექსპერტი, რომლებიც ამ ეტაპამდე მუშაობდნენ კომისიაში. მინისტრმა ხაზგასმით აღნიშნა, რომ დადასტურებულია იმ დღეებში რეგიონში რუსეთის სამხედრო-საჰაერო ძალების წვრთნების გამართვის ფაქტი, მათ შორის სუ-24 ტიპის თვითმფრინავებით ზუსტად იმ ამოცანების შესასრულებლად, რა "ამოცანაც" ჰქონდა დასახული ამ თვითმფრინავს, ისინი მუშაობდნენ სარადარო და ჰაერსაწინააღმდეგო სისტემების წინააღმდეგ მანევრებში.
საქართველოს პრემიერ-მინისტრმა ზურაბ ნოღაიდელმა მადლობა გადაუხადა საქართველოს საგარეო საქმეთა მინისტრს გელა ბეჟუაშვილს და შინაგან საქმეთა მინისტრს ივანე მერაბიშვილს მოწოდებული ინფორმაციისათვის. მან ასევე მადლობა გადაუხადა ყველა უწყებას აღნიშნულ ინციდენტთან დაკავშირებით კოორდინირებული, შეთანხმებული და ეფექტიანი მუშაობისათვის.
საქართველოს მთავრობის კანცელარიის პრესცენტრი