2007 წლის 24 ნოემბერს გაიმართა საქართველოს მთავრობის სხდომა, რომელსაც საქართველოს პრეზიდენტი მიხეილ სააკაშვილი თავმჯდომარეობდა.
სხდომის დაწყებისას საქართველოს პრეზიდენტი მიხეილ სააკაშვილი მიესალმა საქართველოს ახალ პრემიერ-მინისტრს ვლადიმერ გურგენიძეს, მთავრობის ორ ახალ წევრს - განათლებისა და მეცნიერების მინისტრს მაია მიმინოშვილს და ლტოლვილთა და განსახლების მინისტრს კობა სუბელიანს, მთავრობის მთელ შემადგენლობას, წარმატებული საქმიანობა უსურვა და იმედი გამოხატა, რომ მთავრობის წინაშე არსებული მნიშვნელოვანი პროგრამა, რომელიც ამომწურავი, კონკრეტული, რეალისტურია და საქმის ძალიან ზუსტი ცოდნით არის შედგენილი, აღმოჩნდება ის მყარი საფუძველი, რომელზე დაყრდნობით ჩვენ შევძლებთ ქვეყნის ეკონომიკის განვითარებას.
შემდეგ საქართველოს პრეზიდენტმა აღნიშნა, რომ ხელისუფლებამ მიმართა ხალხს განახლებული დემოკრატიული მანდატისათვის, რომ 5 იანვარს ხელახლა მოგვეცეს საშუალება გავაგრძელოთ ქვეყნის მართვა გაძლიერებული დემოკრატიული მხარდაჭერით, ჩვენი ამომრჩევლის აქტიური მონაწილეობით, რათა დავძლიოთ ყველა სირთულე და შევძლოთ იმ ამოცანების გადაწყვეტა, რომლებიც ქვეყნის წინაშეა.
საქართველოს პრეზიდენტმა დამსწრეთ აცნობა, რომ 25 ნოემბრიდან საქართველოს პარლამენტის თავმჯდომარე შეასრულებს ქვეყნის პრეზიდენტის მოვალეობას 40 დღის განმავლობაში, ხოლო თვითონ ჩაებმება პრეზიდენტობის საარჩევნო კამპანიაში. ამიტომ, თქვა მან, გადავწყვიტე მთავრობას მივცე დავალებები გარდამავალ პერიოდთან დაკავშირებით. საქართველოსათვის ეს ძალზე მგრძნობიარე პერიოდია. ჩვენ უნდა უზრუნველვყოთ ქვეყნის უსაფრთხოება, საზოგადოებრივი წესრიგი, თავიდან ავიცილოთ ყველა შესაძლო პროვოკაცია და გართულება, რისი მცდელობა, ეჭვგარეშეა, იქნება. სამართალდაცვის სტრუქტურები მზად არიან, რათა ეს არ დაუშვან. ამავე დროს, ჩვენ უნდა ვიყოთ ძალიან მგრძნობიარე რეგიონალური პრობლემების მიმართ, მზად იმისათვის, რომ ყველა საფრთხის სათანადო დონეზე აცილება მოვახერხოთ.
შემდეგი საკითხი, განაგრძო საქართველოს პრეზიდენტმა, არის ადრინდელი დავალება, რომელიც ახლა აქტუალურია ისე, როგორც არასდროს. ჩვენ, ხაზგასმით აღნიშნა მან, არ უნდა დავუშვათ, რომ საქართველოში ამ ზამთრის განმავლობაში ვინმეს სციოდეს, შიოდეს ან სხვა სახის უკიდურესი პრობლემები ჰქონდეს. ამისათვის უნდა ავამოქმედოთ საპენსიო მექანიზმები და გაზრდილი პენსიები, უმწეოთა დახმარების განსაკუთრებული პროგრამა, მივიღოთ ქმედითი ზომები შეშით უზრუნველყოფისა და ვაუჩერების პროგრამების რეალიზებისათვის, ქვეყნის ენერგეტიკული უსაფრთხოებისათვის, იმისათვის, რომ ზამთრის თვეებში თითოეულ ჩვენს მოქალაქეს, თითოეულ ოჯახს თავიდან ავაცილოთ ყველანაირი სირთულე. ეს დავალება მიღებული გაქვთ, ბიუჯეტში სათანადო ცვლილებები განხორციელდა. ახლა ჯერი პარლამენტზეა და ჩვენ უნდა შევძლოთ ყველა ამ პრობლემის უკეთესად გადაწყვეტა, სიტუაციის ფლობა და მისი გაუმჯობესება.
საქართველოს პრეზიდენტმა განსაკუთრებული ყურადღება დაუთმო არჩევნების დემოკრატიულად გამართვის საკითხს. ჩვენ, თქვა მან, გვინდა არა მხოლოდ ახალი მანდატის მიღება, არამედ ისეთი მანდატის მიღება, რომელიც მთლიანად განამტკიცებს და გააძლიერებს ქვეყნის საერთაშორისო პოზიციებს, თითოეული ჩვენგანის პერსპექტივებს საქართველოს გაერთიანებისა და ქვეყნის უკეთესი მომავლის შექმნისათვის. ამიტომ, ყველა პოლიტიკურ პარტიას თუ ძალას ჩვენ მივცემთ არჩევნებზე გასვლის საშუალებას დემოკრატიულ სიტუაციაში, რათა ქართველმა ხალხმა გადაწყვიტოს, თუ ვის რა შანსს აძლევს, ვის რა მხარდაჭერას აღმოუჩენს. ჩვენ ასევე უნდა უზრუნველვყოთ მასმედიის ყველა საშუალების თავისუფლება იმ პირობებში, როცა დაცული იქნება საქართველოს კანონმდებლობა, გამორიცხული იქნება ყოველგვარი ძალადობრივი მოქმედება. უნდა გადაიდგას ყველა ის ნაბიჯი, რომელიც დემოკრატიულ სამყაროში დემოკრატიას იცავს მის მოწინააღმდეგეთა და ძალადობრივი გზის მომხრეთაგან. ამ თვალსაზრისით საქართველოს მთავრობამ გადადგა სერიოზული ნაბიჯები და ჩემი მთავრობა არჩევნების დღემდე და მის შემდეგ აპირებს ამ მხრივ სერიოზული და მკვეთრი პოზიცია დაიკავოს. ჩვენ ვთანამშრომლობთ ყველა საერთაშორისო ორგანიზაციასთან. მოვიწვევთ ეუთოსა და ევროკავშირის დამკვირვებლებს. ძალიან დიდი მხარდაჭერა აღმოგვიჩინეს ჩვენმა მომხრეებმა. გუშინ საქართველოში ვიზიტად იყვნენ ლიტვის და პოლონეთის პრეზიდენტები, ხოლო ორი დღის წინ ხელი მოვაწერეთ საუკუნის კონტრაქტს სარკინიგზო მაგისტრალის - ყარსი-ახალქალაქი-თბილისი-ბაქოს - მშენებლობის შესახებ. ეს არის ძალიან მნიშვნელოვანი გამოწვევებით აღსავსე პერიოდი არა მხოლოდ მთლიანად ქვეყნისათვის, არამედ თითოეული მისი მოქალაქისათვის, მაგრამ საქართველო, დარწმუნებული ვარ, როგორც ყოველთვის, ამას გადაიტანს მედგრად, მტკიცედ და ჩვენ შვძლებთ მსოფლიოს დავანახოთ ჩვენი სიმტკიცე, ორგანიზებულობა, ის რომ, საქართველოს ჰყავს მთავრობა და ხელისუფლება, რომელსაც შეუძლია სიტუაციის მართვა, ყველანაირ პირობებში ფუნქციონირება და ქვეყნის განვითარებაზე ზრუნვა პოლიტიკურად ყველაზე ცხელ, საარჩევნო პერიოდშიც კი.
ისიც მინდა გითხრათ, განაგრძო საქართველოს პრეზიდენტმა, რომ ამ პერიოდში თქვენს მუშაობას დავაკვირდებით გამადიდებელი შუშით. ჩვენ მრავალი ცვლილება გვექნება. მინდა ეს ყველამ იცოდეს. ყველა დონეზე უნდა გადავდგათ ნაბიჯები, რათა ქვეყნის განვითარება ბევრად უფრო ინტენსიურად და სწორად წარიმართოს, რაც არის საზოგადოებრიობის მოთხოვნა. ამიტომ, მე, ახალი პრემიერ-მინისტრი, თითოეული ჩვენგანი დეტალურად დავაკვირდებით თითოეული მინისტრის, ადგილობრივი მმართველობისა და ყველა დონის ადმინისტრაციული აპარატის წარმომადგენლის მოქმედებას. ყველა წერტილში, სადაც კი სახელმწიფოს შეხება აქვს ხალხთან, უნდა ვიყოთ განსაკუთრებულად მობილიზებული, ეფექტიანები, რათა არ გავაცინოთ ქვეყნის მტერი და საქართველოს ისტორიის ეს ძალზე მნიშვნელოვანი გამოცდა ხუთზე ჩავაბაროთ. საქართველოს პრემიერ-მინისტრს აქვს ყველა მანდატი, რომ ამ 40 დღის განმავლობაში კონკრეტულ გადაწყვეტილებათა კორექტირება მოახდინოს. ცხოვრება უნდა გაგრძელდეს ჩვეულებრივად, მაგრამ განსაკუთრებული მობილიზების პირობებში. ეს არის ძალზე მნიშვნელოვანი 40 დღე. დარწმუნებული ვარ, ყველაფერი კარგად დამთავრდება, ოღონდ ყველა უნდა იყოთ ფხიზლად, იმუშაოთ მეტი მონდომებით. დარწმუნებული ვარ, როგორც აქამდე ვიყავით წარმატებულები, ასევე წარმატებით დავაგვირგვინებთ ამ კამპანიას. 5 იანვარი საქართველოს ისტორიაში შევა როგორც ახალი ეტაპის ათვლის თარიღი, დასძინა მან.
საქართველოს პრემიერ-მინისტრმა ვლადიმერ გურგენიძემ აღნიშნა, რომ ეს მისთვის პირველი სხდომაა, მაგრამ ხედავს მთავრობის წევრთა სამუშაო განწყობას. მან თქვა, რომ მოგვიწევს სერიოზული მუშაობა, რათა 2008 წლის ბიუჯეტი რაც შეიძლება მალე და ხალხზე ორიენტირებული წარვუდგინოთ პარლამენტს. ჩვენ ამას გავაკეთებთ მაქსიმუმ, ალბათ, 10 დღეში, თუ ნაკლებში არა. 40-დღიანი პერიოდის მიუხედავად უკვე დავიწყეთ ფიქრი და მუშაობა იმ სტრატეგიულ პროექტებზე, რომლებიც გვაქვს, იქნება ეს ფოთი, რკინიგზა თუ სხვა და სხვა, რადგან საამისოდ სხვა დრო არ იქნება.
აღნიშნულთან დაკავშირებით საქართველოს პრეზიდენტმა განაცხადა, რომ ერთ-ერთი მთავარი დარტყმა, რომლის მოყენებაც გარკვეულ წრეებს უნდოდათ ბოლო რამდენიმე კვირის განმავლობაში, მიმართულია ჩვენს საინვესტიციო ფონდზე, რომ საქართველოში არავინ ჩადოს ფული. თუ ჩვენ მშვიდად გავივლით ამ პერიოდს, პირიქით, ბევრად უფრო მეტ შედეგს მივიღებთ. ეს არ არის დიდი საიდუმლო. რამდენად წყნარი და სტაბილური იქნება გარდამავალი პერიოდი, იმდენად მეტი ინვესტიცია ჩამოვა საქართველოში; ე.ი. უფრო მეტი სამუშაო ადგილები გაჩნდება, უფრო მეტი საშუალება იქნება ჩვენი წარმოების, ვაჭრობის სექტორის აღმავლობისათვის თითოეული ადამიანის შესაძლებლობათა გასაფართოებლად.
საქართველოს პრეზიდენტმა დამსწრეთ შეახსენა, რომ 1 დეკემბერს იწყება უმუშევრობის დაძლევის პროგრამის რეალიზება. საქართველოს შრომის, ჯანმრთელობისა და სოციალური დაცვის სამინისტროსთან ერთად განხორციელდა სათანადო კორექტირება, რათა ეს პროგრამა ბევრად უფრო ფოკუსირებული გამხდარიყო. ამ კუთხით უკვე მიღებულია შემოთავაზებები ბიზნესის სფეროდან და ეს მუშაობა უნდა გაგრძელდეს. რიგ რაიონებში დაიწყო დაზღვევის პროგრამის, მასწავლებლების ხელფასის პროგრამის რეალიზება. დღეს, თქვა მან, შევხვდი მასწავლებლებს. ისინი იმედის თვალით უყურებენ ამ ღონისძიებას და ჩვენ არ უნდა გავაწბილოთ მათი მოლოდინი. ეს ხელფასების ზრდის მხოლოდ დასაწყისია, რაც რეალურად მოხდება ამ სექტორში. თბილისი და ბათუმი იწყებენ ამას. ეს კიდევ რამდენიმე ადგილას გაკეთდება. ეს იქნება დაზღვევა, უფრო სწორად, დამატებითი სამედიცინო დახმარება წამლებით. ეს ეხება იმ ხალხს, ვისაც ყველაზე მეტად უჭირს, ცალკე აღებული ვაუჩერები, რამაც რეგულარული ხასიათი უნდა მიიღოს, რადგან ერთია დაზღვევა, მეორეა ხალხი, ვინც სახლშია, რომელსაც პრობლემები არ უნდა შეექმნას. ამ ეტაპზე, სადაც შევძლებთ ამას, დავიწყოთ და შემდეგ გავავრცელოთ მთელ ქვეყანაში.
ასევე არის კონკრეტული საკითხები, რომლებიც დაკავშირებულია ენერგომომარაგებასთან, გაზიფიკაციასთან, ვაუჩერების დაცვასთან, რადგან რამდენიმე ადგილას შეიქმნა ტექნიკური სიძნელეები, რომლებიც ერთად უნდა გამოვრიცხოთ. ენერგეტიკის სამინისტრო პირადად უნდა ჩაერთოს, რათა ამ კუთხით პრობლემები ვერავინ შექმნას. ასევეა შეშასთან დაკავშირებით, განაგრძო საქართველოს პრეზიდენტმა. საქართველოს გარემოს დაცვისა და ბუნებრივი რესურსების სამინისტროსთან ერთად განსაკუთრებული გადაწყვეტილება მივიღეთ და ამ მიმართულებითაც რაიმე ბიუროკრატიას ადგილი არ უნდა ჰქონდეს. ყველა გადაწყვეტილება, რომელიც ამ ოთახში მიიღება, ხალხამდე უნდა მივიდეს ყოველგვარი არასწორი ინტერპრეტირებისა და ზედმეტი ბიუროკრატიის გარეშე. ეს ძალზე მნიშვნელოვანია და ყველას უნდა ესმოდეს, რომ პოლიტიკური ბრძოლების, ბატალიების ფონზე, ქვეყანა ფუნქციონირებს ჩვენი მოწინააღმდეგისათვის მოულოდნელად, მაგრამ ჩვენთვის გასაგებად, ძალიან კარგად და სწორად. ჩვენ შევქმენით ისეთი ქვეყანა, რომელსაც ასე ადვილად ვერავინ შეარყევს და ეს რყევები არ შეეტყობა მის მოქალაქეებს.
საქართველოს პრეზიდენტმა მოუწოდა ქვეყნის მოქალაქეებს, შეინარჩუნონ სიმშვიდე და ორგანიზებულად წავიდნენ არჩევნებზე, რადგან ახლა, როგორც არასდროს, წყდება ქვეყნისათვის ფუნდამენტური საკითხი, შედგება საქართველო, როგორც სახელმწიფო, თუ არა, შეძლებენ მტრული ძალები მისი სახელმწიფოებრივი საფუძვლების შერყევას? აქამდე ვერ შეძლეს და მომავალშიც ყველამ უნდა გავიზიაროთ პასუხისმგებლობა და არ მივცეთ საშუალება ბნელ, მაფიოზურ, ოლიგარქიულ ბინძურ ძალებს საქართველოში რაიმე სახის პრობლემა შექმნან. ეს არის ძალიან ფუნდამენტური ამოცანები ამ უახლოესი 40 დღის განმავლობაში. მათდა მოულოდნელად საქართველოს პოლიტიკურმა სპექტრმა, მთავრობამ, პარლამენტმა გამოიჩინა საოცარი ერთსულოვნება, მაგრამ ეს ბოლომდეა შესანარჩუნებელი. ჩვენმა მოქალაქეებმა ბოლომდე უნდა დაინახონ, რომ ეს ყველაფერი შეუქცევადია, ეს ყველაფერი კეთდება მათთვის და მათი თანამონაწილეობა აქ იქნება გარანტირებული. საბოლოო ჯამში, თითოეული ჩვენგანის გადასაწყვეტია საქართველოს, თითოეული ჩვენგანის, თითოეული ოჯახის მომავალი.
საქართველოს პრეზიდენტმა იმედი გამოხატა, რომ ასევე გაგრძელდება ყველა იმ საკითხზე მუშაობა, რაც საქართველოს თავდაცვას ეხება. რაც შეეხება პოლიციას, თქვა მან, ვფიქრობ, აქ ზომები მიღებულია და უზრუნველყოფა სათანადო დონეზეა. ენერგეტიკის კუთხით კონტრაქტები გვაქვს, რომლებიც გრძელდება. ამასთან გრძელდება მოლაპარაკებაც, მათ შორის, გრძელვადიან კონტრაქტებზე. სოციალური კუთხით ბევრი რამ დავთვალეთ და თუ კიდევ რამ არის დასათვლელი და გასაკეთებელი, ვფიქრობ, ამას გააგრძელებთ. საერთაშორისო პარტნიორებთან, როგორც ევროპული კუთხით, ასევე მთლიანად საერთაშორისო კუთხით, საგარეო საქმეთა სამინისტრო აგრძელებს მუშაობას. და ეს მუშაობა ძალზე ინტენსიური უნდა იყოს. აქ უნდა ჩამოვიდეს ძალიან ბევრი დამკვირვებელი, რომ ვერავინ შეძლოს რაიმე პრობლემის შექმნა არჩევნებთან დაკავშირებით.
ლტოლვილთა და განსახლების ახალმა მინისტრმა, განაგრძო საქართველოს პრეზიდენტმა, მინდა იცოდეს, რომ ზამთრის პერიოდი ყველაზე რთულად ჩვენი საზოგადოების ყველაზე დაუცველი ნაწილისათვის, დევნილებისათვის არის გადასატანი. ამიტომ, შეეცადე დასაქმების პროგრამაში მათი მაქსიმალურად ჩართვა. 11-ლარიანი დახმარების მოცულობა მათ აუცილებლად უნდა გავუზარდოთ, მაგრამ დასაქმების პროგრამაში ჩართვით დევნილს შეუძლია 600 ლარი აიღოს. ამას მაქსიმალურად უნდა გავუწიოთ რეკლამა, რათა დევნილებმა დაინახონ, რომ მათაც აქვთ პერსპექტივა, განსაკუთრებით ქალაქებში, ამ პირველ ეტაპზე, იმისათვის, რომ ასევე უკეთესი შემოსავლები და უკეთესი დასაქმების პერსპექტივა ჰქონდეთ. საბოლოო ჯამში, საქართველოს მთავრობამ უნდა შექმნას აფხაზეთში მათი დაბრუნების ზუსტი, დროში გაწერილი, პერსპექტივა, იქ, სადაც ყველანი უნდა დავბრუნდეთ, და საერთოდ, ამ კონფლიქტების გადაწყვეტის პერსპექტივა. ეს, ასევე ჩვენი ნორმალური ცხოვრებისა და ქვეყნის ტერიტორიული მთლიანობის საკითხებიც, 5 იანვარს წყდება.
საქართველოს ლტოლვილთა და განსახლების მინისტრმა კობა სუბელიანმა მადლობა გადაუხადა საქართველოს პრეზიდენტს გამოცხადებული ნდობისათვის და აღუთქვა, რომ თითოეული დავალება დაუზარებლად იქნება შესრულებული, რომ მისი საქციელით პრეზიდენტს არ მიადგეს ჩრდილი.
საქართველოს პრემიერ-მინისტმა ვლადიმერ გურგენიძემ საქართველოს პრეზიდენტს მიაწოდა ინფორმაცია, რომ 3 დეკემბერს ლონდონში დაგეგმილია მისი შეხვედრა ინვესტორებთან. შეხვედრაზე, თქვა მან, განმარტებული იქნება ის პროცესები, რომლებიც საქართველოში მიმდინარეობს. განწყობა ძალზე კარგია, რადგან ინვესტორებს შორის არიან ისეთები, ვინც წლების განმავლობაში აბანდებს თავის კაპიტალს საქართველოში, ვისაც მრავალჯერ შევხვედრივარ. ახალ როლში ეს იქნება მათთან ჩემი პირველი შეხვედრა და ვეცდები განვუმარტო და ავუხსნა, თუ რა პერსპექტივები გველოდება, რა მყარი საფუძველი აქვს ჩვენს ეკონომიკურ ოპტიმიზმს. 4-6 დეკემბერს შეხვედრები ბრიუსელში იგეგმება.საქართველოს პრემიერ-მინისტრმა აღნიშნა, რომ დღეს გაიმართა მისი, ფინანსთა მინისტრისა და ეკონომიკური განვითარების მინისტრის შეხვედრა საქართველოს წამყვან ბიზნესმენებთან. მან თქვა, რომ მზადდება ერთობლივი, საინტერესო ინიციატივები, ასე ვთქვათ, კრეატიული. ამასთან დაკავშირებით აუცილებელია ექსპორტის მაქსიმალურად ხელშეწყობა, საინვესტიციო კლიმატის გაუმჯობესება. ჩვენს კომპანიებს საკუთარი პროდუქცია გააქვთ უზბეკეთში, აზერბაიჯანში და ა.შ., მაგრამ აქვთ კონკრეტული პრობლემები. ალბათ უნდა შედგეს საუბარი საგარეო საქმეთა სამინისტროსთან, თუ როგორ დავეხმაროთ ქართულ კომპანიებს კონკრეტულ ბაზრებზე დასამკვიდრებლად.
საქართველოს პრეზიდენტი დაინტერესდა სკოლების გათბობის პრობლემის გადაწყვეტის მიზნით განხორციელებულ სამუშაოთა მიმდინარეობით. მან თქვა, რომ დღეს რუსთავში გახსნა ახალი ტექნიკური სასწავლებელი, რომლის სამიდან ორ კორპუსში ჯერჯერობით არ არის ჩართული გათბობა. ტემპერატურა კი იქ ნულთან ახლოსაა. მან დაავალა საქართველოს განათლებისა და მეცნიერების სამინისტროს საგანგებო რეჟიმში შეისწავლოს ამ მხრივ არსებული მდგომარეობა და მიიღოს ზომები სკოლებში გათბობის უზრუნველსაყოფად. სადაც ამის შესაძლებლობა არ არის, იქ უნდა შეიტანონ შეშა, ფულის პრობლება არ უნდა იყოს.
აღნიშნულთან დაკავშირებით თბილისის მერმა გიგი უგულავამ მთავრობის სხდომას მიაწოდა ინფორმაცია, რომ განათლებისა და მეცნიერების სამინისტროსთან შემუშავებული ერთობლივი პროგრამის თანახმად სკოლებში დაგეგმილი იყო გაზის მიყვანა, შიდა ქსელის მოწყობა და გათბობის დამონტაჟება, რაც პრაქტიკულად ყველგან შესრულდა. დარჩენილია დამონტაჟების სამუშაოები 22 სკოლაში და ამ ერთი კვირის განმავლობაში, შესაბამისი ტესტირების გავლის შემდეგ, 60 სკოლაში გათბობა ჩაირთვება. ზოგიერთ სკოლაში ეს შეიძლება ორი დღით დაგვიანდეს, ისიც ტესტირების გამო. თბილისში ყველა სკოლა გაზიფიცირებულია, არც ერთ სკოლაში შეშა არ გვჭირდება, გარდა სამისა, სადაც გაზი ვერ მივიყვანეთ და ისინიც უზრუნველყოფილი იქნებიან დიზელის საწვავით.
წამოჭრილ პრობლემასთან დაკავშირებით საქართველოს პრეზიდენტმა განაცხადა, რომ აუცილებელია გადაწყდეს საწვავით უზრუნველყოფის პრობლემა იქ, სადაც გაზი არ არის. ქუთაისშიც ზუსტად ასეთი სიტუაციაა. ჩვენ გამოვყავით 2,5 მლნ ლარი, თქვა მან, რომ ქუთაისში მომხდარიყო სკოლების გაზიფიკაცია. საკითხი საგანგებო კონტროლზე აქვს პრემიერს. სამეგრელოში, იმერეთში რამდენიმე ადგილას დავიწყეთ გაზიფიკაცია. თუკი სადმე შეიძლება, რომ მოვასწროთ და სკოლებამდე მივიყვანოთ, გავაკეთოთ. ეს ეხება საქართველოს სხვა რეგიონებსაც. საერთოდ, მომავალ წელს საქართველოს უმთავრეს რეგიონებში ძირითადი გაზიფიკაციის სამუშაოები უნდა დამთავრდეს. ეს ძალზე პრინციპული საკითხია.
ასევე არის მრავალი დეტალი, განაგრძო საქართველოს პრეზიდენტმა. მაგალითად, ჩვენ ახლა გვაქვს არა მხოლოდ თბილისი-იგოეთის გზის დამთავრების პრობლემა, რომელსაც ამ დღეებში ვამთავრებთ, არამედ კახეთის მთელი გზის განათების პრობლემა. სართიჭალის მონაკვეთი განათებულია, მაგრამ ასევე უნდა გავანათოთ მთელი გზა თელავამდე. ეს არის ვიწრო გზა, სადაც მოძრაობა გაიზარდა. იგივე ითქმის თბილისი-იგოეთის მონაკვეთზეც. ხომ დეტალებია, მაგრამ ყველა ასეთი რამ უნდა გაგრძელდეს ჩვეულებრივად. ერთი ბოძიც რომ იყოს ჩასასობი და არ ჩავასოთ, ან არ დავაყენოთ ნათურა იმის გამო, რომ საარჩევნო კამპანია მიმდინარეობს, ეს იქნება დიდი და გამოუსწორებელი შეცდომა. დემოკრატია ასეა, სულ არის საარჩევნო კამპანიები და საქმეც კეთდება.
საქართველოს პრეზიდენტი დაინტერესდა საჯარო რეესტრში არსებული ვითარებით, საკითხებით, რომლებიც ეხება ქონების დაკანონებას, აგრეთვე რეგისტრაციის მიმდინარეობას, რაზეც საქართველოს იუსტიციის მინისტრმა ეკა ტყეშელაშვილმა განაცხადა, რომ ყველაფერი წესრიგშია, ყველანი მობილიზებული არიან და დეპარტამენტის დონეზეც შეფერხებები არ არის. სამოქალაქო რეესტრში არის სერიოზული ცვლილებები. კერძოდ, მოსახლეობისათვის გაცილებით უფრო გაადვილდება ინფორმაციის მიღება საკუთარი მონაცემების შესამოწმებლად. შემოღებულია ესემესის (SMS) სამსახური, რაც თანამედროვე მეთოდია. ნებისმიერ მოქალაქეს საშუალება მიეცემა თვითონ, ამასთან მარტივად გადაამოწმოს საკუთარი ინფორმაცია ესემესის (SMS) გაგზავნით და იმავდროულად მიიღოს სათანადო ინფორმაცია. მომავალ კვირას იგეგმება ამ ღონისძიების პრეზენტაცია და ამ სიახლის დანერგვაც. გარდა ამისა, სიების დონეზე ფაქტობრივად მუშაობა დასრულებულია, მონაცემების გადამოწმება იდეალურ დონეზეა, შესაძლოა იყოს ერთი პროცენტის ცდომილება, რაც მსოფლიოს მასშტაბით საკმაოდ კარგი პრეცედენტია, რამდენ ქვეყანაში 3-4% მისაღებად ითვლება, ჩვენ იმაზე უფრო დაბლა ჩამოვალთ ცდომილების თვალსაზრისით და კარდაკარ შემოვლის შესაბამისად, უკვე პირადი მონაცემები აღირიცხება სამოქალაქო რეესტრში, რაც, შესაბამისად, საარჩევნო სიებშიც ასევე აისახება. არგუმენტი იმის თაობაზე, რომ რაღაც ცდომილებები შეიძლება იყოს, ფაქტობრივად ფიქტიურია.
საქართველოს პრეზიდენტმა გამოთქვა რწმენა, რომ რეგისტრაციასა და საარჩევნო სიებზე პრობლემები არ იქნება. მან თქვა, რომ ქვეყნის არაკეთილმოსურნენი, მათ შორის ზოგიერთი საარჩევნო სუბიექტი, შეეცდებიან ეს გააკეთონ, როგორც ყოველთვის, ამის ილუზია შექმნან. ისინი ხომ ილუზიონისტები არიან, ყოველ შემთხვევაში ზოგიერთი მათგანი. ამიტომ ჩვენ არც ერთ ასეთ პოლიტიკურ კიოს არ უნდა მივცეთ საშუალება ეჭვის ნიშანიც კი დასვას ამის თაობაზე. ყველაფერი უნდა იყოს გამჭვირვალედ, კონკრეტულად და მაშინ საქმე ბოლომდე კარგად მივა. ეს ძალზე მნიშვნელოვანია.
საქართველოს პრეზიდენტი დაინტერესდა რეგიონებში არსებული მდგომარეობით, რაიონებში სპორტული ობიექტების მშენებლობით, ასევე მოსახლეობის შეშით უზრუნველყოფის საკითხით, რის შესახებ მან აღნიშნა, რომ ეს საკითხი არ უნდა ამოსულიყო პრეზიდენტის დონეზე. რაღაც ტყეები ჩვენ გავეცით იჯარით, მაგრამ ზოგიერთი მოიჯარე მუდმივად არის რაღაცის კეთების საწყის ეტაპზე. იმ პირობებში, როცა მოსახლეობა მუდამ ჭრიდა ტყეს და ახლა შენ მას ტყეში არ უშვებ, ეს გადაწყვეტილება არ იყო სწორი, რის შესახებაც თავიდანვე გაგაფრთხილეთ. სამწუხაროდ, ნამდვილად მოხდა გადაჭარბება ამ მიმართულებით. ყველა არ ისარგებლებს ამ ვაუჩერებით, მაგრამ რამდენიმე წელი ზედიზედ ჰქონდეთ და ისარგებლონ. ჩვენ გვირჩევნია ამით სახელმწიფომ ნაკლები შემოსავალი მიიღოს, მაგრამ მეტ ადამიანს ჰქონდეს თავისუფლად მოქმედების საშუალება. საუბარია საკუთარი ოჯახის გასათბობ ხე-ტყეზე და არა ტყის მასივების გაჩეხვაზე.
აღნიშნულთან დაკავშირებით საქართველოს მთავრობის კანცელარიის უფროსის მოადგილემ, რეგიონალურ საკითხთა დეპარტამენტის უფროსმა ჯამბულ ბაკურაძემ განაცხადა, რომ რეგიონებში ნორმალური სიტუაციაა, ინვესტიციების დაბანდება დაწყებულია. რაც შეეხება სპორტულ ობიექტებს - ზუგდიდში უკვე დამთავრებული უნდა იყოს, ოზურგეთში თვის ბოლოს დამთავრდება, თამარაშენში კი დამთავრებულია, მისასვლელი გზის გაკეთება გახდა საჭირო. მოსახლეობის შეშით უზრუნველყოფის თაობაზე მან თქვა, რომ ბოლო კვირაში მდგომარეობა გამოსწორდა მას შემდეგ, რაც მივიღეთ გლეხების იქ შეშვების გადაწყვეტილება. ამასთან, ბოლომდე არ არის საბავშვო ბაღებისა და სკოლების შეშით უზრუნველყოფის საკითხი გადაწყვეტილი.
საკითხის აქტუალობიდან გამომდინარე საქართველოს პრეზიდენტმა დაავალა განათლებისა და მეცნიერების სამინისტროს, გარემოს დაცვისა და ბუნებრივი რესურსების დაცვის სამინისტროს, სხვა სამინისტროებს, საქართველოს მთავრობის კანცელარიის რეგიონალურ საკითხთა დეპარტამენტს, საქართველოს პრეზიდენტის სახელმწიფო რწმუნებულებს - გუბერნატორებს განახორციელონ სათანადო ღონისძიებები, რათა უახლოეს დღეებში გადაწყდეს შესაბამისი სახის საწვავით ყველა სკოლისა და საბავშო ბაღის უზრუნველყოფის საკითხი.
საქართველოს პრეზიდენტი ასევე დაინტერესდა გზების საკითხით, კერძოდ ზემო აფხაზეთში ახლად გაყვანილი გზის ფუნქციონირებით. ახლა, ეს 40 დღე არის ძალიან სენსიტიური პერიოდი. რა რაოდენობის თოვლიც უნდა მოვიდეს ზემო აფხაზეთში, იმისათვის რომ ზემო აფხაზეთი დაცული იყოს, ხალხმა თავი მშვიდად იგრძნოს, თუნდაც უსაფრთხოების თვალსაზრისით, ეს გზა, რომ დაგვჭირდეს 24 საათი მუშაობა და მთელი ჩვენი ტექნიკის იქ თავმოყრა, უნდა იყოს გაწმენდილი და გახსნილი ქვეყნის სტაბილურობის ინტერესებიდან გამომდინარე. სხვა შემთხვევაში, შეიძლება რაღაც პრობლემები შეექმნათ იქ მყოფ ადამიანებს, რაც არ უნდა დავუშვათ, განაცხადა მან.
საქართველოს მთავრობის კანცელარიის უფროსის მოადგილემ, რეგიონალურ საკითხთა დეპარტამენტის უფროსმა ჯამბულ ბაკურაძემ საქართველოს პრეზიდენტს აცნობა, რომ აღნიშნულთან დაკავშირებით მიღებულია სათანადო გადაწყვეტილებები და საქართველოს ეკონომიკური განვითარების საავტომობილო გზების დეპარტამენტის ინფორმაციით ზემო აფხაზეთის ახალ გზაზე პრობლემები არ შეიქმნება და იგი გახსნილი იქნება.
დასასრულ საქართველოს პრეზიდენტმა მიხეილ სააკაშვილმა კიდევ ერთხელ უსურვა წარმატებული საქმიანობა საქართველოს მთავრობას, იმედი გამოხატა, რომ ყველაფერი ბოლომდე ისე შესრულდება, როგორც გათვალისწინებულია და დასძინა, - 5 იანვარს ყველას გისურვებთ არა მხოლოდ გამარჯვებას, არამედ გამარჯვებას დიდი უპირატესობით. ჩვენ უბრალოდ გამარჯვება არ გვინდა. ჩვენ გვინდა შთამბეჭდავი, დამაჯერებელი, ძალიან დიდი ანგარიშით გამარჯვება, არჩევნების მოგება და საქართველოს გადასვლა განვითარების შემდგომ, ძალიან გადამწყვეტ ეტაპზე. ღმერთმა ხელი მოგიმართოთ.
საქართველოს მთავრობის კანცელარიის საორგანიზაციო დეპარტამენტი