2008 წლის 6 აგვისტოს გაიმართა საქართველოს მთავრობის სხდომა. დღის წესრიგში შეტანილი იყო 34 საკითხი. დღის წესრიგი
მთავრობის სხდომის დაწყებისას საქართველოს პრემიერ-მინისტრი ვლადიმერ გურგენიძე შეეხო საქართველოში მიმდინარე ინფლაციურ პროცესებს. მან თქვა, რომ ივლისი, ისევე როგორც ივნისი, იყო დეფლაციური. ინფლაციამ -1,2% შეადგინა, რაც იმას ნიშნავს, რომ ივლისში ფასებმა 1,2%-ით დაიკლო. ტრენდი არის ძალიან კარგი. თუ მაისში იყო ფასების მატება 0,7%-ით, ივნისში დაფიქსირდა მცირე კლება, 0,1%-ით, ხოლო ივლისში ამ კლებამ უკვე 1,2% შეადგინა. შედეგად, დადგინდა წლიური ინფლაცია, რომელიც ივლისის ბოლოსთვის არის 9,8%, ანუ შემცირდა 11%-დან 9,8%-მდე და პირველად ძალიან ბევრი ხნის განმავლობაში ინფლაციის მაჩვენებელმა შეადგინა ერთნიშნა ციფრი. ეს ძალიან დადებითი ტრენდია. ბუნებრივია, ჩვენ ამაზე შეჩერება არ შეგვიძლია. შეგახსენებთ, ეროვნული ბანკის მიზანია, რომ მიმდინარე წლის ბოლოსთვის ინფლაციის მაჩვენებელი იყოს 8%, რაც სრულიად ნორმალური იქნება ჩვენნაირი ზრდის მქონე ქვეყნისათვის. დღესდღეობით, საქართველოში არსებული ინფლაციის დონე ყველაზე დაბალია რეგიონში, ჩვენს სამეზობლოში. ინფლაციის უფრო მაღალი დონეა აღმოსავლეთ ევროპის მრავალ ქვეყანაში. ხაზგასმით მინდა აღვნიშნო ამ საქმეში ეროვნული ბანკის ძალიან დიდი დამსახურება და მადლობა გადავუხადო მის კოლექტივს პროფესიონალიზმისა და გამბედაობისათვის. ის, რომ ივნის-ივლისში ჩვენ დეფლაციური ფონი გვაქვს, პირველ რიგში ეროვნული ბანკის მიერ საპროცენტო განაკვეთების მატების გზით გადაგმული გაბედული ნაბიჯების შედეგია. თუმცა, ეს ჩემი პირადი აზრია, ამ დეფლაციურ ფონზე ალბათ ახლო მომავალში შესაძლებელი იქნება გარკვეულწილად, და სულ მცირედით, საპროცენტო განაკვეთების შემცირება. ხაზგასმით მინდა აღვნიშნო, რომ ეს მხოლოდ და მხოლოდ ეროვნული ბანკის გადასაწყვეტია, მე მხოლოდ ჩემს პირად აზრს ვაფიქსირებ. კიდევ ერთხელ მადლობა მათ.
შემდეგ საქართველოს პრემიერ-მინისტრმა დამსწრეთ შეახსენა, რომ წინა სხდომაზე დარიგდა მთავრობის 50-თვიანი პროგრამის სამუშაო ვერსია. მან თქვა, რომ აღნიშნულთან დაკავშირებით გასული კვირის განმავლობაში გაიმართა რამდენიმე თათბირი გაფართოებული ფორმატით, მათ შორის უცხოელი ექსპერტების მონაწილეობით. განხილული იყო საკითხები, რომლებიც ეხებოდა წყალმომარაგებას, ენერგეტიკას და ა.შ. ასევე გაიმართა შეხვედრები რამდენიმე სამინისტროსთან ამ თემატიკასთან დაკავშირებით. მიმდინარე კვირაში კიდევ რამდენიმე ასეთი შეხვედრაა დაგეგმილი, მათ შორის დღეს, და ამის შედეგად მთავრობის მომდევნო სხდომისათვის ალბათ თავმოყრილი იქნება ყველა ის შენიშვნა, დამატებითი ინიციატივა თუ მოსაზრება, რაც ამ პროგრამას საბოლოო სახეს მისცემს, რათა შემდეგ ჩვენ იგი პრეზიდენტს წარვუდგინოთ. საქართველოს პრემიერ-მინისტრმა მადლობა გადაუხადა ყველას გაწეული მუშაობისათვის და დასძინა, რომ ამ ერთი კვირის განმავლობაში ყველა სამინისტროს მართებს ძალიან დაძაბულ რეჟიმში მუშაობა, რათა 50-თვიანი პროგრამის საბოლოო ვარიანტი შევიმუშაოთ.
საქართველოს მთავრობის კანცელარიის საორგანიზაციო დეპარტამენტი