2021-04-01
რადიკალური ოპოზიცია არ ცდილობს, გამოვიდეს იმ ჩიხიდან, რომელშიც სრულიად გაუგებარი გათვლებით შევიდა, მათ არ ეყოთ გამბედაობა და გონიერება, უარი ეთქვათ აბსოლუტურად დაუსაბუთებელ პრეტენზიებზე და ხელი მოეწერათ დოკუმენტზე, - ამის შესახებ საქართველოს პრემიერ-მინისტრმა ირაკლი ღარიბაშვილმა მთავრობის სხდომაზე განაცხადა. მისი თქმით, ხელისუფლება უფლებას იტოვებს, აღარ დაკარგოს დრო ოპოზიციის ახირების განხილვაზე და მთლიანად ორიენტირდნენ რეალურ პრობლემებზე, რომლებიც ხალხს და ქვეყანას აწუხებს.
"მინდა გამოვეხმაურო მოლაპარაკებების პროცესს, რომელიც ევროპული საბჭოს პრეზიდენტის შარლ მიშელის პირადი წარმომადგენლის კრისტიან დანიელსონის მედიაციით აქტიურად მიმდინარეობდა გასული დღეების განმავლობაში. რამდენიმე მნიშვნელოვანი დასკვნა, რაც, შეთანხმების მიუღწევლობის მიუხედავად, მაინც უნდა გამოვიტანოთ ამ პროცესიდან, - კრისტიან დანიელსონის მიერ შემოთავაზებულ დოკუმენტში ვადამდელ არჩევნებზე მინიშნებაც კი არ ყოფილა. ეს ბუნებრივია, ვინაიდან ქართველი ხალხის უდიდესი უმრავლესობა, მთელი დასავლური საზოგადოება, მთელი მსოფლიო აღიარებს 2020 წლის საპარლამენტო არჩევნებს და მის შედეგებს. შესაბამისად, შედეგების ლეგიტიმაციასთან დაკავშირებით არავითარი კითხვის ნიშნები არ არსებობს. თუმცა, მთელი ცივილიზებული საზოგადოებისგან განსხვავებით, რადიკალური ოპოზიცია, ვხედავთ, რომ არ ცდილობს გამოვიდეს იმ ჩიხიდან, რომელშიც თავად ნებაყოფლობით, თუმცაღა სრულიად გაუგებარი გათვლებით, შევიდა. მინდა ასევე აღვნიშნო, ჩვენ დავრწმუნდით, რომ მათ არ ეყოთ გამბედაობა და გონიერება, უარი ეთქვათ აბსოლუტურად დაუსაბუთებელ პრეტენზიებზე და ხელი მოეწერათ დოკუმენტზე.
დღეს, როცა ვითარება ყველასთვის ცხადია, ჩვენ უფლებას ვიტოვებთ, აღარ დავკარგოთ დრო ამ ახირების განხილვაზე და მთლიანად ვორიენტირდეთ რეალურ პრობლემებზე, რომლებიც ჩვენს ხალხს და ჩვენს ქვეყანას აწუხებს. ჩვენ დაწყებული გვაქვს ძალიან მნიშვნელოვანი პროექტები, მასშტაბურ პროექტებს წარმოვადგენთ უახლოეს რამდენიმე კვირაში, ეს იქნება სოფლის მეურნეობის, ინფრასტრუქტურის, ეკონომიკის მიმართულებით. აქედან გამომდინარე, ჩვენ არ გვექნება დასაკარგი დრო ამ უშინაარსო და აბსოლუტურად არაპროდუქტიულ მოლაპარაკებებზე დასახარჯად. ასევე, მინდა მოსახლეობისთვის განვმარტო კიდევ ერთხელ, რომ ყველა იმ საკითხზე, რომლებიც წარმოდგენილი იყო მედიატორის მიერ შემოთავაზებულ დოკუმენტში, ჩვენ გვქონდა შემხვედრი პოზიცია კომპრომისული, კონსტრუქციული, რაც მთავარია, ქვეყნის უკეთესი მომავლისკენ მიმართული ნაბიჯების გადასადგმელად. ჩვენმა გუნდმა მაქსიმუმი გააკეთა შეთანხმების მისაღწევად, თუმცა რადიკალურ ოპოზიციას შეთანხმება არ სურდა, სთხოვდა მედიატორს დოკუმენტში დამატებითი პუნქტების შეტანას და მოლაპარაკების ჩაშლაზე იყო ორიენტირებული. სხვათა შორის, ამას ადასტურებენ თავად ოპოზიციის შედარებით ზომიერი წარმომადგენლებიც.
ვფიქრობ, ყველასთვის ცხადი გახდა, რომ ხელოვნურად შექმნილი ეგრეთ წოდებული კრიზისი, რომლის მთავარ პრობლემად წარმოჩენასაც ცდილობენ, სინამდვილეში მხოლოდ თავად რადიკალური ოპოზიციის მწვავე კრიზისია. ჩვენ მადლიერი ვართ ჩვენი მეგობრების, ევროკავშირის ინსტიტუტების, ბატონი შარლ მიშელისა და კრისტიან დანიელსონის უდიდესი პირადი ძალისხმევის. მიუხედავად იმისა, რომ საბოლოო შეთანხმება არ შედგა, ეს პროცესი მაინც ძალზე მნიშვნელოვანი იყო ყველასთვის. ვფიქრობ, ევროპა დღეს კიდევ უფრო კარგად ერკვევა ჩვენს ვითარებაში და ქართველმა ხალხმაც უფრო ცხადად დაინახა, თუ ვის რა ინტერესები ამოძრავებს. ეს კი ნამდვილად სასარგებლო გამოცდილებაა ჩვენთვის,"- განაცხადა ირაკლი ღარიბაშვილმა.
მთავრობის ადმინისტრაციის პრესსამსახური