2011 წლის 8 ნოემბერს საქართველოს პრემიერ-მინისტრი ნიკა გილაური ყვარელში იმყოფებოდა. ყვარლის მეორე საჯარო სკოლაში პრემიერ-მინისტრი განათლების სისტემის წარმომადგენლებს შეხვდა. ნიკა გილაურმა მათ განათლების ახალი ბიუჯეტი და მთავრობის ათპუნქტიანი სამოქმედო გეგმა გააცნო. შეხვედრა ახლადგახსნილ „ჯეოსელის" კლასში გაიმართა. როგორც პრემიერ-მინისტრმა აღნიშნა იმედოვნებს, რომ „მომავალ წელს ასი ასეთი კლასი იქნება."
„მომავალ წელს განათლების სამინისტროს დაფინანსება 25 მლნ-ით გაიზრდება. გარემონტდება სკოლები, მასწავლებლებს უნდა გაეზარდოთ ხელფასები. კარგია, რომ სერთიფიცირებული მასწავლებლების რაოდენობა იზრდება.
გაეროს ბავშვთა ფონდის რეპორტის მიხედვითაც საქართველოში ბავშვების მდგომარეობა შეფასებულია მაღალ დონეზე, ასევე ჯანდაცვა და განათლება. შემცირებულია ბავშვების სიკვდილიანობა, გაუმჯობესებულია ბავშვების მდგომარეობა ღარიბ ოჯახებში," - განაცხადა ნიკა გილაურმა საუბრისას.
პრემიერ-მინისტრმა განათლების სფეროში მიმდინარე პროცესების, სიახლეებისა და სამომავლო გეგმების შესახებ ისაუბრა. 2011 წელს შეიცვალა სკოლის დაფინანსების ვაუჩერის ფორმულა, რომელმაც აღმოფხვრა დეფიციტური სკოლები და სწორი მოტივაცია მისცა სკოლის დირექტორებს ხარჯების ოპტიმიზაციისათვის და საუკეთესო მასწავლებლების მოზიდისთვის.
ნიკა გილაურის განმარტებით, 2011-2015 წლებზე გათვლილი მთავრობის სამოქმედო გეგმის მიხედვით, სახელმწიფო კვლავ გააგრძელებს პროექტებს, რომლებიც სწავლის ხარისხის გაუმჯობესებას, საერთაშორისო სტანდარტებისა და თანამედროვე ტექნოლოგიების დანერგვას, მოსწავლეთა მოტივაციის ამაღლებასა და მასწავლებელთა პროფესიულ ზრდას ემსახურება.
გაგრძელდება პედაგოგთა სერტიფიცირება, შესაბამისად გაიზრდება მათი ხელფასები, მომავალში მასწავლებლებს კიდევ უფრო მეტი საშუალება მიეცემათ პროფესიული ზრდისთვის, გაუუმჯობესდებათ სამუშაო პირობები.
„ვაუჩერს ვაძლევთ მე-10, მე-12 კლსასელებს, უმწეოებს ვაძლევთ 100% ვაუჩერს გარკვეულ სფეროებზე. ნებისმიერ სხვა ადამიანის ვაუჩერი, რომელსაც გადამზადება უნდა, დამოკიდებულია ტესტის რეზულტატზე.
პროფსასწავლებლებში 7 მლნ ლარი შევა და განავითარებს კერძო სექტორს. კერძო და სახელმწიფო კომპანიები უზრუნველყოფენ სწორ მარკეტინგს," - აღნიშნა მან.
აგრეთვე, ყვარლის მეორე საჯარო სკოლის მესამე კლასის მოსწავლეს ნუკი ავაზაშვილს ნიკა გილაურმა დაბადების დღეზე პრეზიდენტისგან საჩუქარი iPad-ი და ტორტი გადასცა.
პრემიერ-მინისტრის პრესსამსახური