2010 წლის 20 აგვისტოს საქართველოს მთავრობის სხდომა გაიმართა. დღის წესრიგში 57 საკითხი იყო შეტანილი. დღის წესრიგი.
სხდომის დაწყებამდე საქართველოს პრემიერ-მინისტრმა ნიკა გილაურმა 2010 წლის ივლისის ეკონომიკური აქტივობის შესახებ ისაუბრა.
წარმოგიდგენთ პრემიერ-მინისტრის სიტყვას:
„წინასწარი მონაცემებით, პირველი ექვსი თვის ეკონომიკური ზრდა 5.5%-დან 6% შეადგენს. ზუსტი მონაცემი სექტემბერის დასაწყისში გვექნება.
სასიამოვნოა, რომ ტემპის ზრდის ტენდენცია ივლისის თვეშიც ისეთივე არის, როგორიც პირველი ექვსი თვის განმავლობაში იყო.
რამოდენიმე მაგალითს მოვიყვან: ძალიან მნიშვნელოვანია ზრდა საბანკო დეპოზიტების მხრივ. გასული წლის ივლისი წლევანდელს რომ შევადაროთ, საბანკო დეპოზიტები 44%-ით გაზრდილია.
ხაზი მინდა იმას გავუსვა, რომ არსებულ დეპოზიტთა რაოდენობა (3.9 მლრდ ლარზე უფრო მეტი) რეკორდულად მაღალია საქართველოს ისტორიაში.
სასესხო პორტფელებიც გაზრდილია და გასული წლის ივლისი წლევანდელს რომ შევადაროთ, ზრდა შეადგენს 10%-ს. გარდა ამისა, რეალური სექტორი ძალზედ მნიშვნელოვანია, აქ ზრდა ავტომობილების რეგისტრაციაში გვაქვს. თუ პირველი ექვსი თვის განმავლობაში ზრდა იყო მხოლოდ 15%-ი, გასული წლის ივლისი წლევანდელს რომ შევადაროთ, ზრდა შეადგენს 34 %-ს.
ყველაზე მნიშვნელოვანი ციფრი დღგ-ს გადამხდელთა ბრუნვებია, რაც ეკონომიკურ აქტივობასთან ყველაზე ახლო კორელაციაშია. ივლისის თვის მონაცემების მიხედვით აქაც საკმაოდ კარგი ციფრი დაფიქსირდა.
თუ ექვსი თვის განმავლობაში დღგ-ს ბრუნვის ზრდა იყო 25%-ი, გასული წლის ივლისი წლევანდელს რომ შევადაროთ, ზრდა წარმოადგენს 28%-ს.
სასიამოვნოა ის, რომ ეკონომიკური ზრდა სხვადასხვა სექტორებზე ვრცელდება. განსაკუთრებით, ზრდა ექსპორტის მიმართულებით და ტურიზმის მიმართულებით არის აღსანიშნავი.
მინდა ხაზი გავუსვა ვიზიტორთა რაოდენობას, რომელიც გასულ წელთან შედარებით 33%-ით გაიზარდა.
ეს ძალიან მნიშვნელოვანია იმისათვის, რომ ეკონომიკურმა აქტივობამ ზრდა არ შეწყვიტოს, შეიქმნას კიდევ უფრო მეტი სამუშაო ადგილი და ჩვენი ბრძოლა უმუშევრობასთან გავაგრძელოთ."
პრემიერ-მინისტრის პრესსამსახური