საქართველოს გააჩნია ისტორიული შესაძლებლობა ააშენოს თავისუფალი, ერთიანი, დემოკრატიული, შეძლებული და სამართლიანი სახელმწიფო, მნიშვნელოვანი ნაბიჯები გადაიდგა ამ მიმართულებით „ვარდების რევოლუციის" შემდეგ, რაც ახალი ქართული სახელმწიფოს ფუნდამენტად იქცა.
ახალი ქართული სახელმწიფო - თანამედროვე განვითარებული კაცობრიობის ნაწილი - იქნება ადამიანის განვითარებისა და საქმიანობის თავისუფლებაზე დაფუძნებული სახელმწიფო - სახელმწიფო პიროვნებისათვის.
ახალი ქართული სახელმწიფო - ეს არის:
- თავისუფალი საქართველო - ადეკვატური თავდაცვისუნარიანობით;
- ერთიანი საქართველო - მისი ყოველი მოქალაქისათვის;
- დემოკრატიული საქართველო - გამჭვირვალე სახელმწიფო ინსტუტუტებით, განვითარებული სამოქალაქო საზოგადოებით და სიტყვის თავისუფლებით;
- სამართლიანი საქართველო - დამოუკიდებელი და მიუკერძოებელი სასამართლო სისტემით;
- შეძლებული საქართველო - კერძო საკუთრების დაცულობით და ეკონომიკური თავისუფლებით;
ამ მიზნების მიღწევისათვის საქართველოს მთავრობის პრიორიტეტულ მიმართულებებს წარმოადგენს:
- ტერიტორიული მთლიანობის მშვიდობიანი გზებით აღდგენა და სამოქალაქო ერთობა;
- მდგრადი ეკონომიკური ზრდა და დასაქმების ხელშეწყობა;
- ქმედითი მმართველობის ფორმირება;
- ინფრასტრუქტურის რეაბილიტაცია და განვითარება;
- ნატოში გაწევრიანება; ევროკავშირთან თანმიმდევრული ინტეგრაცია;
სახელმწიფო მიზნების მიღწევის პირობებია, ერთის მხრივ, საზოგადოებრივი სტაბილურობის უზრუნველყოფა და მეორეს მხრივ, რეფორმათა დინამიკის შენარჩუნება და სახელმწიფოს მოდერნიზაცია.
საქართველოს მთავრობის ამოცანები
- მეტი სამუშაო ადგილი კერძო სექტორში;
- გამჭვირავალე და ქმედითი სახელმწიფო მმართველობა და თვითმმართველობა;
- ეფექტიანი მართლმსაჯულება;
- ადეკვატური თავდაცვისუნარიანობა;
- ქმედითი სამართალდამცავი სისტემა;
- ენერგოუსაფრთხოება;
- გამოთანაბრებული რეგიონული განვითარება;
- მდგრადი და ეფექტური ბუნებათსარგებლობა;
- ხარისხიანი და კონკრეტული განათლების შესაძლებლობა;
- ღია და ტოლერანტული კულტურული გარემო;
- განვითარებულ და მეზობელ ქვეყნებთან საერთაშორისო ეკონომიკური და კულტურული ინტეგრაცია.
საქართველოს მთავრობის სამოქმედო პრიორიტეტები
სახელმწიფო პოლიტიკა
ეროვნული უსაფრთხოების და საგარეო პოლიტიკის სფერო
ეროვნული უსაფრთხოების კონცეფციის თანამიმდევრული განხორციელება;
ინტენსიური დიალოგისა (ID) და გაწევრიანების სამოქმედო გეგმის (MAP) განხორციელების საფუძველზე ნატო-ში გაწევრიანება;
შეიარაღებული ძალების მართვის ოპტიმიზაცია და ბრძოლისუნარიანობის ამაღლება; არმიის რეფორმირება ნატო-ს სტანდარტების შესაბამისად; შეიარაღებული ძალების სამოქალაქო კონტროლის სისტემის სრულყოფა; პროფესიული შეიარაღებული ძალების ფორმირების დასრულება;
ევროპის სამეზობლო პოლიტიკის სამოქმედო გეგმის (ENP Action Plan) წარმატებული განხორციელება და ევროკავშირთან „ოთხი თავისუფლების" - ადამიანების, კაპიტალის, საქონლისა და მომსახურების გადაადგილების - ხარისხის გაზრდა;
სამეზობლო არეალში შავი ზღვისა და სამხრეთ კავკასიის რეგიონული თანამშრომლობის ეფექტურობის ზრდა;
დიპლომატიური და საკონსულო ქსელის გაფართოება;
სახელმწიფოს ინსტიტუციური მშენებლობა
კონფლიქტების მშვიდობიანი გზით გადაწყვეტისა და ტერიტორიული მთლიანობის აღდგენისათვის სამშვიდობო ინიციატივებისა და სამოქმედო გეგმების მიზანმიმართული განხორციელება, მათ შორის:
კონფლიქტების პოლიტიკური გადაწყვეტის პროცესში საერთაშორისო თანამეგობრობის როლის გაზრდა;
კონფლიქტურ რეგიონებში მცხოვრებ მოსახლეობასთან და საზოგადოებასთან პირდაპირი დიალოგის გააქტიურება, ნდობის აღდგენისა და რეაბილიტაციისკენ მიმართული ინიციატივების განხორციელება;
ყოფილი სამხრეთ ოსეთის ოლქის დროებითი ადმინისტრაციულ-ტერიტორიული ერთეულის ადმინისტრაციის ეფექტურობის გაზრდა;
ზემო აფხაზეთის სრული ინფრასტრუქტურული და სოციალური რეინტეგრაცია;
სასამართლოს დამოუკიდებელი, სანდო, მიუკერძოებელი და ოპტიმიზებული სისტემის დამკვიდრების ხელშეწყობა;
სისხლის, სამოქალაქო და ადმინისტრაციული სამართლის რეფორმა საზოგადოებრივი სტაბილურობის, სახელმწიფოს მოდერნიზაციის და ადამიანის უფლებების დაცვის უზრუნველყოფის მიზნით;
ქმედითი თვითმმართველობის ჩამოყალიბების ხელშეწყობა; უფლებამოსილებათა და ქონების გამიჯნვა;
საზოგადოებრივი უსაფრთხოების სისტემის განვითარება ფუნქციური და მატერიალურ-ტექნიკური უზრუნველყოფის გაუმჯობესების გზით; საგანგებო სიტუაციების მართვის სისტემის გაუმჯობესება;
საზღვრის დაცვის პოლიციური სისტემის განვითარება;
სახელმწიფო ადმინისტრირება და რეგულირება
სამართლებრივი სფერო
სააღმსრულებლო სისტემის რადიკალური რეფორმა სასამართლო გადაწყვეტილებების დროულად და ეფექტურად აღსრულების მიზნით;
ერთიანი სამოქალაქო რეესტრის ინფრასტრუქტურისა და მონაცემთა ბაზის ფორმირება; საჯარო რეესტრის სანდოობისა და მომსახურების ხარისხის ზრდა;
პენიტენციური სისტემის ინფრასტრუქტურის რეაბილიტაცია და ინსტიტუციური რეფორმა; პატიმართა უფლებების დაცვის და რესოციალიზაციის ეფექტური მექანიზმების შემუშავება;
საკანონმდებლო ბაზის კრიტიკული და სისტემური რევიზია;
სახაზინო ადვოკატის ხელმისაწვდომი და კვალიფიციური ინსტიტუტის ფორმირება.
სახელმწიფო მმართველობის სფერო
საქართველოს ეროვნული ანტიკორუფციული სტრატეგიის ეფექტურად შესრულება;
სახელმწიფო მმართველობის და საჯარო სამსახურის რეფორმირება, კადრების შერჩევის და მოტივაციის სისტემის სრულყოფა „მცირე ხელისუფლებისა" და „კარგი მმართველობის" დანერგვის მიზნით;
სახელმწიფო მმართველობის ორგანოების რეგულარული საჯარო ანგარიშგების, ანგარიშვალდებულების და სამოქალაქო კონტროლის მექანიზმების სრულყოფა;
სახელმწიფო ბიუჯეტის საშუალოვადიანი, შედეგზე ორიენტირებული სახარჯო პოლიტიკისა და მექანიზმების დახვეწა.
ეკონომიკური თავისუფლება და ინფრასტრუქტურული განვითარება
ეკონომიკის ინსტიტუციური დერეგულირება
სალიცენზიო-სანებართვო საკანონმდებლო მოთხოვნათა სრული დანერგვა და ზედამხედველობის სისტემის გამართვა;
სახელმწიფო საკუთრებაში არსებული სამეურნეო სუბიექტებისა და ქონების განსახელმწიფოებრიობის დასრულება; სახელმწიფო ქონების მართვის გამჭვირვალობის ზრდა და კომერციალიზაცია;
მეწარმეობაზე სახელმწიფო რეგულირების ზემოქმედების მინიმალიზება; ,,რეგულირების ზემოქმედების შეფასების" სისტემის დანერგვა და ინსტიტუციონალიზება;
ბუნებრივი (მათ შორის სატყეო) რესურსების ეკონომიკურ ბრუნვაში ჩართვა; ბუნებრივი რესურსების სარგებლობის ფორმების დივერსიფიკაცია, მდგრადი განვითარების უზრუნველსაყოფად;
სასოფლო-სამეურნეო სექტორის რეფორმირება რეგულირებისა და ინტერვენციის შემცირებით;
სოფლის მეურნეობაში რეფორმირება კერძო ინვესტიციების საფუძველზე; პროგრამის "ასი ახალი საწარმო" განხორციელება; სასოფლო-სამეურნეო წარმოების ეფექტურობისა და კონკურენტუნარიანობის ზრდისათვის პირობების შექმნა;
სოფლის მეურნეობის პროდუქტებისათვის ალტერნატიული ბაზრების მოპოვების ხელშეწყობა;
საფინანსო სექტორის რეფორმირება საქართველოს თანამედროვე საფინანსო ცენტრად გადასაქცევად;
თავისუფალი ინდუსტიული ზონების შექმნა;
ბიზნესის წარმოებისათვის საუკეთესო გარემოს უზრუნველყოფა და საკრედიტო რეიტინგის გაუმჯობესება;
,,თავისუფალი ვაჭრობის ხელშეკრულებეზე" მუშაობა სტრატეგიულ სავაჭრო პარტნიორებთან.
ეკონომიკის ინფრასტრუქტურული უზრუნველყოფა
ინფრასტრუქტურის განვითარებისათვის კერძო-საჯარო პარტნიორობის გამოყენება;
ენერგეტიკული სისტემის მდგრადობისა და უსაფრთხოების უზრუნველყოფა ალტერნატივების გაზრდის მეშვეობით და საერთაშორისო ენერგოსისტემებში ინტეგრაციის უფრო მაღალი ხარისხით;
რეგიონული განვითარება საინჟინრო და სოციალური ინფრასტრუქტურის ინტენსიური რეაბილიტაციის და განვითარების გზით;
ტრანსპორტის ყველა სახეობისათვაის „ღია პოლიტიკის" გატარება მობილურობის, საერთაშორისო ინტეგრაციისა და სატრანზიტო მიმზიდველობის უზრუნველსაყოფად;
წყლის რესურსების სააუზო მართვის სისტემის დანერგვა;
სამელიორაციო სისტემის რეაბილიტაცია და კომერციალიზაცია;
სასურსათო უვნებლობის ერთიანი სისტემის სრულყოფა; ქვეყნის ეპიზოოტიური კეთილსაიმედოობის ზრდა.
პიროვნების განვითარება
სოციალური დაცვის სფერო
სოციალური დახმარების ინტეგრირებული, სიღატაკის აღმოფხვრაზე ორიენტირებული სისტემის ფორმირება;
მიზნობრივი ჯგუფებისათვის (ღარიბები და ხნიერები) სამედიცინო დაზღვევის ვაუჩერული სისტემის განვითარება;
ხანდაზმულ ასაკში სიღარიბისაგან მიზნობრივი დაცვის სისტემის ფორმირება;
ჯანდაცვის სისტემის მომხმარებელზე ორიენტირებული, კერძო საკუთრებაზე დამყარებული და სადაზღვევო პრინციპებს მორგებული ინსტიტუციური რეფორმა; ჰოსპიტალური სექტორის განვითარების გენერალური გეგმის - ,,ასი ახალი საავადმყოფო" პირველი ეტაპის დასრულება და შემდგომი ეტაპების თანამიმდევრული განხორციელება;
ოჯახის ექიმის ინსტიტუტის განვითარებისათვის საჯარო-კერძო პარტნიორობის პროგრამის განხორცილება პირველადი ჯანდაცვის სისტემის რეაბილიტაციიის და ხელმისაწვდომობის გაზრდის მიზნით.
განათლება და კულტურა
კერძო-სახელმწიფო პარტნიორობა განათლების, კულტურის და სპორტის ახალი ინფრასტრუქტურის შესაქმნელად და არასახელმწიფო სექტორის როლის ზრდა;
უმაღლესი განათლებისა და მეცნიერების ინტეგრაცია; ქ. თბილისში ,,ცოდნის ქალაქის" ფორმირება;
სამეცნიერო კვლევების დაფინანსების საგრანტო-კონკურენტული სისტემის სრულყოფა;
განათლებისა და მეცნიერების სისტემის საერთაშორისო საგანმანათლებლო და კვლევით სივრცესთან ინსტიტუციური და პროგრამული თავსებადობის ხელშეწყობა;
ახალი საგანმანათლებო და კვლევითი ინფრასტრუქტურის შექმნა, მათ შორის კერძო-სახელმწიფო პარტნიორობის საფუძველზე;
ეკონომიკის ახალ მოთხოვნებზე ორიენტირებული პროფესიული განათლების სისტემის ფორმირება; კერძო-საჯარო პარტნიორობა პროფესიული გადამზადების გზით ახალი სამუშაო ადგილების შექმნის წახალისება;
ძეგლთა რესტავრაცია და პრევენციული კონსერვაცია;