უმაღლესი საგანმანათლებლო დაწესებულების სტატუსის მოპოვების მიზნით საჯარო სამართლის იურიდიული პირის - დავით აღმაშენებლის სახელობის საქართველოს ეროვნული თავდაცვის აკადემიის დაფუძნების შესახებ
მუხლი 1. ,,უმაღლესი განათლების შესახებ~ საქართველოს კანონის მე-6 მუხლის პირველი პუნქტის ,,დ" ქვეპუნქტის, მე-11 მუხლისა და ,,საჯარო სამართლის იურიდიული პირის შესახებ საქართველოს კანონის მე-5 მუხლის მე-2 პუნქტის საფუძველზე:
1. უმაღლესი საგანმანათლებლო დაწესებულების სტატუსის მოპოვების მიზნით დაფუძნდეს დავით აღმაშენებლის სა-ხელობის საქართველოს ეროვნული თავდაცვის აკადემია (შემ-დგომში - თავდაცვის აკადემია) საჯარო სამართლის იუ¬რი¬დი-ულ პირად.
2. საქართველოს განათლებისა და მეცნიერების სამინისტრომ:
ა) განახორციელოს თავდაცვის აკადემიის სახელმწიფო კონტროლი;
ბ) თავდაცვის აკადემიის მართვის ორგანოების არჩევამდე საქართველოს პრემიერ-მინისტრს დასანიშნად წარუდგინოს თავდაცვის აკადემიის რექტორის მოვალეობის შემსრულებლის კანდიდატურა.
3. უმაღლესი საგანმანათლებლო დაწესებულების სტატუსის მოპოვების შემთხვევაში საქართველოს განათლებისა და მეცნიერების სამინისტრომ უმაღლესი განათლების შესახებ საქართველოს კანონის შესაბამისად უზრუნველყოს თავდაცვის აკადემიის წესდების დამტკიცება და კანონმდებლობით განსაზღვრული სხვა ღონისძიებების განხორციელება.
4. საქართველოს ეკონომიკისა და მდგრადი განვითარების სამინისტრომ უზრუნველყოს თავდაცვის აკადემიისათვის შესაბამისი ქონების კანონმდებლობით დადგენილი წესით გადაცემა.
5. საქართველოს პრემიერ-მინისტრმა, საქართველოს განათლებისა და მეცნიერების სამინისტროს წარდგინებით, დანიშნოს რექტორის მოვალეობის შემსრულებელი საჯარო სამართლის იურიდიული პირის - თავდაცვის აკადემიის რექტორის პირველი არჩევნების შედეგების დამტკიცებამდე. 6. მართვის ორგანოების არჩევამდე თავდაცვის აკადემიის რექტორის მოვალეობის შემსრულებელი:
ა) თავდაცვის აკადემიის უმაღლესი თანამდებობის პირია, რომელიც წარმართავს დაწესებულების საქმიანობას, ამზადებს მას ავტორიზაციის გასავლელად, წარმოადგენს დაწესებულებას სხვა ფიზიკურ და იურიდიულ პირებთან ურთიერთობაში და მოქმედებს დაწესებულების სახელით;
ბ) ხელს უწყობს უმაღლესი განათლების ევროპულ სივრცეში ინტეგრაციას, სასწავლო გეგმებისა და პროგრამების შექმნას, უმაღლეს საგანმანათლებლო დაწესებულებებს შორის თანამშრომლობასა და მობილურ და ინტეგრირებულ სწავლებას;
გ) ხელმძღვანელობს დაწესებულების ადმინისტრაციას;
დ) ამტკიცებს დაწესებულების სტრუქტურას;
ე) საქართველოს კანონმდებლობით დადგენილი წესით ამტკიცებს დაწესებულების საშტატო ნუსხას;
ვ) საქართველოს კანონმდებლობით დადგენილი წესით სამსახურში იღებს და ათავისუფლებს მუშაკებს;
ზ) საქართველოს კანონმდებლობით დადგენილი წესით ამტკიცებს აკადემიური, ადმინისტრაციული და დამხმარე პერსონალის სამსახურში მიღების ერთიან წესს, შრომის ანაზღაურების ოდენობასა და პირობებს;
თ) განსაზღვრავს პროფესორის პედაგოგიური დატვირთვის ზღვრულ ოდენობას;
ი) შეიმუშავებს და ამტკიცებს დაწესებულების ბიუჯეტს;
კ) საქართველოს კანონმდებლობით დადგენილი წესით განკარგავს დაწესებულების ფინანსებსა და ქონებას;
ლ) უფლებამოსილია, საქართველოს კანონმდებლობით დადგენილი წესით, დაწესებულების სახელით, დაწესებულების ბიუჯეტის შესაბამისად დადოს გარიგებები;
მ) სასწავლო წლის დასაწყისში ამტკიცებს კოეფიციენტებს ერთიანი ეროვნული გამოცდებისათვის, აგრეთვე მისაღებ სტუდენტთა რაოდენობას;
ნ) ამტკიცებს სასწავლო და სამეცნიერო-კვლევითი მუშაობის შეფასების წესს;
ო) ნიშნავს დაწესებულების ბიბლიოთეკის ხელმძღვანელს;
პ) ამტკიცებს საგანმანათლებლო საქმიანობის ძირითად მიმართულებებს;
ჟ) „უმაღლესი განათლების შესახებ" საქართველოს კანონის შესაბამისად ადგენს საგანმანათლებლო პროგრამების საფასურის ოდენობის ჩამონათვალს;
რ) ამტკიცებს საგანმანათლებლო პროგრამებს;
ს) „უმაღლესი განათლების შესახებ" საქართველოს კანონით დადგენილი წესის შესაბამისად ამტკიცებს პროფესორ-მასწავლებელთა აკადემიურ თანამდებობებზე აყვანის წესს;
ტ) თავისი კომპეტენციის ფარგლებში გამოსცემს ინდივიდუალურ ადმინისტრაციულ-სამართლებრივ აქტებს;
უ) პასუხისმგებელია უმაღლესი განათლების სფეროში მოქმედი ნორმატიული აქტების შესრულებისათვის;
ფ) პასუხისმგებელია დაწესებულების ფინანსური და ეკონომიკური საქმიანობის კანონიერებისა და ეფექტიანობისათვის;
ქ) უფლებამოსილია საკუთარი კომპეტენციის ფარგლებში შექმნას კომისიები და საბჭოები სათათბირო უფლებით და განსაზღვროს მათი უფლებამოვალეობანი და საქმიანობის წესი;
ღ) ამტკიცებს სტუდენტური თვითმმართველობის პირველი არჩევნების ჩატარების დებულებას და უზრუნველყოფს სტუდენტური თვითმმართველობის პირველი არჩევნების ჩატარებას;
ყ) ახორციელებს საქართველოს კანონმდებლობით მინიჭებულ სხვა უფლებამოსილებებს.
მუხლი 2. დადგენილება ამოქმედდეს გამოქვეყნებისთანავე.
პრემიერ-მინისტრი ნიკა გილაური