2016-09-29

გლდანში 40 000 კვ.მეტრის ფართობზე განთავსებული, სამსართულიანი სავაჭრო ცენტრი გაიხსნა. მასშტაბური სავაჭრო ცენტრის - "სითი მოლი გლდანის" გახსნის ცერემონიას საქართველოს პრემიერ-მინისტრი დაესწრო.

გიორგი კვირიკაშვილმა ახლადგახსნილი "სითი მოლი" დაათვალიერა და იმედი გამოთქვა, რომ ამგვარი სავაჭრო ცენტრების აშენება ხელს შეუწყობს ქალაქის განვითარებას და გააჩენს დამატებით სამუშაო ადგილებს.

პროექტის საინვესტიციო ღირებულება 45 მილიონი ლარია. სხვადასხვა პერიოდში პროექტის დაწყებიდან დასრულებამდე 2000-მდე ადამიანი იყო დასაქმებული, ამჟამად დასაქმებულია 1000-ზე მეტი ადამიანი.
სავაჭრო ცენტრი აშენებულია უახლესი ევროპული სტანდარტების მიხედვით და სრულად უზრუნველყოფილია პარკინგითა და უახლესი თანამედროვე ტექნოლოგიებით.

პრემიერ-მინისტრის პრესსამსახური