საქართველოს მთავრობა government.gov.ge |
საქართველოს შეუძლია, იამაყოს ახალი კანონით «პროკურატურის შესახებ» - მაიკლ ო ბოილი
2015-10-30 საქართველოს შეუძლია, იამაყოს ახალი კანონით „პროკურატურის შესახებ", რომელიც ძალიან მნიშვნელოვანი წინგადადგმული ნაბიჯია, - ამის შესახებ საქართველოს მთავრობის სპეციალურმა მრჩეველმა ადამიანის უფლებებისა და კანონის უზენაესობის საკითხებში, მაიკლ ო ბოილმა პრემიერ-მინისტრ ირაკლი ღარიბაშვილთან შეხვედრის შემდეგ განაცხადა. შეხვედრაზე საუბარი შეეხო ქვეყანაში მიმდინარე დემოკრატიულ რეფორმებს და იმ პოზიტიურ ცვლილებებს, რომელიც საქართველოში, ადამიანის უფლებებისა და კანონის უზენაესობის მიმართულებით, ბოლო 3 წლის განმავლობაში განხორციელდა. „ძალიან კონსტრუქციული შეხვედრა გვქონდა პრემიერ-მინისტრთან, საქართველოში ადამიანის უფლებებთან დაკავშირებით. მე მას მივულოცე „პროკურატურის შესახებ" კანონის მიღება, რომელსაც ჩვენ და ევროპის საბჭოს ვენეციის კომისია მნიშვნელოვან წინგადადგმულ ნაბიჯად განვიხილავთ. ეს არის კანონი, რომელიც შემუშავდა ევროპელ პარტნიორებთან კონსულტაციების შედეგად. ვფიქრობ, ეს არის მოძრაობა სწორი მიმართულებით და საქართველოს შეუძლია, ამით იამაყოს", - განაცხადა მაიკლ ო ბოილმა. შეხვედრაზე საუბარი ასევე შეეხო სასჯელაღსრულების სისტემის რეფორმასთან დაკავშირებულ საკითხებს და პროგრამებს, რომლებიც საქართველოში ევროპის საბჭოს მხარდაჭერით ხორციელდება. პრემიერ-მინისტრის პრესსამსახური
|