2007 წლის 13 ნოემბერს გაიმართა საქართველოს მთავრობის სხდომა. დღის წესრიგში შეტანილი იყო 45 საკითხი. დღის წესრიგი
მთავრობის სხდომის დაწყებისას საქართველოს პრემიერ-მინისტრმა ზურაბ ნოღაიდელმა დამსწრეთ აცნობა, რომ 14 ნოემბერს საქართველოს პრემიერ-მინისტრი სამუშაო ვიზიტით ჩავა ანკარაში, სადაც გაიმართება მოლაპარაკება თურქეთთან თავისუფალი ვაჭრობისა და სხვა ეკონომიკურ საკითხებზე. შეთანხმებას თურქეთთან თავისუფალი ვაჭრობის შესახებ, თქვა მან, დიდი მნიშვნელობა აქვს რუსეთის ფედერაციის მიერ განხორციელებული ეკონომიკური ემბარგოს პირობებში. ამ შეთანხმებამ ხელი უნდა შეგვიწყოს განსაკუთრებით სოფლის მეურნეობის პროდუქციის ექსპორტში, რაც ჩვენი ეროვნული მეურნეობის ერთ-ერთი ძირითადი მიმართულებაა.
საქართველოს პრემიერ-მინისტრმა აღნიშნა, რომ წელს უხვია ციტრუსის მოსავალიც. ამ პროდუქციის უდანაკარგოდ აღებისა და დაბინავებისათვის, ისევე როგორც რთვლის დროს, საჭიროა შეიქმნას მუდმივმოქმედი შტაბი, რომელიც იფუნქციონირებს ქალაქ ბათუმში და კოორდინაციას გაუწევს მოსავლის აღებასთან დაკავშირებულ ყველა სამუშაოს შესრულებას. მან დაავალა საქართველოს სოფლის მეურნეობის მინისტრს პეტრე ცისკარიშვილს განახორციელოს სათანადო ღონისძიებები და ციტრუსის მოსავლის აღების პერიოდისათვის ბათუმში მიავლინოს სამინისტროს წარმომადგენლი.
საქართველოს მთავრობის კანცელარიის საორგანიზაციო დეპარტამენტი