2008 წლის 12 აპრილს გაიმართა საქართველოს მთავრობის სხდომა. დღის წესრიგში შეტანილი იყო 30 საკითხი. დღის წესრიგი
სხდომის დაწყებისას საქართველოს პრემიერ-მინისტრმა ვლადიმერ გურგენიძემ დამსწრეთ მიულოცა ქალაქ კრასნოიასკში რუსეთის ეროვნულ ნაკრებთან გამარჯვებით რაგბში საქართველოს ეროვნული ნაკრების მიერ ევროპის ერთა თასის მოპოვება და დაავალა საქართველოს ფინანსთა სამინისტროს და კულტურის, ძეგლთა დაცვისა და სპორტის სამინისტროს გამონახონ საშუალება, რათა ამ მიღწევისათვის ჩვენი ქვეყნის ეროვნული ნაკრები გუნდი დაჯილდოვდეს 100 ათასი ლარით.
შემდეგ საქართველოს პრემიერ-მინისტრმა დამსწრეთ მიაწოდა ინფორმაცია 9-10 აპრილს ბაჰრეინში თავისი ვიზიტის შესახებ. მან თქვა, რომ გაიმართა შეხვედრები საინტერესო ინვესტორებთან, რომელთაც ახლო მომავალში ვიხილავთ საქართველოში და კმაყოფილება გამოხატა ქვეყანაში ფინანსური ცენტრის ჩამოყალიბების გადაწყვეტილებით. ბაჰრეინმა ეს დაახლოებით 20-25 წლის წინ გააკეთა და მას შემდეგ წარმატებით მისდევს ამ ლიბერალურ მოდელს. ბაჰრეინში სულ 500 ათასი მოქალაქეა, მაგრამ მისი მთლიანი შიდა პროდუქტი ორჯერ მეტია საქართველოს ანალოგიურ მაჩვენებელთან შედარებით, ხოლო ეკონომიკის მეოთხედზე მეტი საფინანსო სექტორზე მოდის. აი, ასეთი შედეგები შეიძლება მოიტანოს ლიბერალიზაციამ და გამიზნულმა მუშაობამ ფინანსური ცენტრის ჩამოყალიბებისათვის, დასძინა დასასრულ საქართველოს პრემიერ-მინისტრმა.
საქართველოს მთავრობის კანცელარიის საორგანიზაციო დეპარტამენტი