2020-08-07
არ არსებობს სხვა გზა მშვიდობის გარდა, ჩვენი ყველაზე დიდი შრომა არის ის, რომ დავიბრუნოთ ჩვენი მიწა მშვიდობიანი გზით, ყოველდღიური შრომით, ყოველდღიური სწავლით, ამ ბავშვების მომავლით, მათ განათლებით და რაც მთავარია, წარმატებული, დემოკრატიული და ევროპული სახელმწიფოს მშენებლობით, - ამის შესახებ საქართველოს პრემიერ-მინისტრმა გიორგი გახარიამ 251 დევნილი ოჯახისთვის დირსის ახალაშენებულ კორპუსებში ბინების გადაცემის ცერემონიაზე განაცხადა.
მთავრობის მეთაურმა აღნიშნა, რომ 7 აგვისტო ქვეყნის უახლეს ისტორიაში უმძიმესი დღეა.
„დღეს არის 7 აგვისტო, ჩვენი ქვეყნის უახლეს ისტორიაში უმძიმესი დღე. დღე, როდესაც დაწყებულმა ომმა დაგვაკარგვინა ჩვენი მოქალაქეები, ჩვენი ჯარისკაცები, დაგვაკარგინა საქართველოს ტერიტორიის 20 % და, რა თქმა უნდა, უაღრესად სიმბოლურია, როდესაც დღეს რუსეთის მიერ 12 წლის წინ ოკუპირებულ ქვეყანაში ჩვენ ჯერ კიდევ ვზრუნავთ და ჯერ კიდევ უამრავი დევნილი გვყავს, რომელთაც სჭირდებათ სახელმწიფოს ზრუნვა. ყველას კარგად გვესმის, რომ ზღვაში წვეთია, როდესაც ჩვენ დღეს ასეთი სიხარულით ბავშვებთან ერთად და პირველ რიგში ბავშვების გამო ჩვენს დევნილებს გადავცემთ 251 საცხოვრებელს. ადამიანებს, რომელთაც ამ ომის შედეგად მოუწიათ საკუთარი სახლები დაეტოვებინათ და რომლებიც დღემდე არიან ჭერის გარეშე და, რა თქმა უნდა, ყველას კარგად გვესმის, რომ ეს არის ზღვაში წვეთი, მაგრამ ამ ბავშვების მომავლისთვის უნდა გავაგრძელოთ და ასეთი დღეებიც უნდა ვიზეიმოთ. ყველას უნდა გვესმოდეს რომ მიუხედავად იმისა, რომ 13 წლის შემდეგ სახელმწიფომ დევნილებს გადასცა 21 000-ზე მეტი საცხოვრისი და წელს წლის ბოლომდე კიდევ 2000 დევნილი მიიღებს ახალ საცხოვრებელ ფართს, ეს მაინც არაფერია, იმიტომ რომ ჩვენი ვალია, თითოეული ქართველის, საქართველოს თითოეული მოქალაქის, რომ გარდა იმისა, რომ ვიზრუნებთ თქვენს ყოველდღიურ კომფორტულ ცხოვრებაზე, უნდა ვიზრუნოთ იმაზე, რომ ჩვენ ყველანი ერთად მშვიდობით დავბრუნდეთ ჩვენს მიწაზე, ჩვენს იმ სახლებში, ძველ სახლებში და ეს მერე უნდა დაგვრჩეს აქ როგორც ასეთი, დამატებითი საჩუქარი. უნდა გვახსოვდეს ერთი რამ - არ არსებობს სხვა გზა მშვიდობის გარდა, ჩვენი ყველაზე დიდი შრომა არის ის, რომ დავიბრუნოთ ჩვენი მიწა მშვიდობიანი გზით, ყოველდღიური შრომით, ყოველდღიური სწავლით, ამ ბავშვების მომავლით, მათ განათლებით და რაც მთავარია, წარმატებული, დემოკრატიული და ევროპული სახელმწიფოს მშენებლობით, საქართველოს ყველა ხელისუფლება, ვინც არ უნდა იყოს წლების განმავლობაში, საბოლოო მიზნის მიღწევამდე - და ეს მიზანია ქვეყნის სრული დეოკუპაცია, უნდა ვიბრძოლოთ, უნდა ვიდგეთ ერთად, ეს ის მიზანი უნდა იყოს, რომელმაც უნდა გააერთიანოს საქართველოს თითოეული მოქალაქე. გილოცავთ ამ დღეს და მინდა, ამ ბავშვების სიხარული აუცილებლად გავაზავოთ იმ მწუხარებით და ქედის მოხრით, რომელსაც იმსახურებენ ჩვენი გმირი ჯარისკაცები და ვაჟკაცები, რომლებმაც შესწირეს თავისი ყველაზე ძვირფასი სიცოცხლე საქართველოს ერთიანობას და საქართველოს მთლიანობას. მინდა, ამ ბავშვებს ვუსურვო პირველ რიგში, რომ ამ ქვეყანას აღარ დასჭირდეს სიცოცხლის გაღება ტერიტორიული მთლიანობის აღდგენისთვის. გილოცავთ!" - აღნიშნა პრემიერ-მინისტრმა.
მთავრობის მეთაურთან ერთად 251 დევნილი ოჯახისთვის ბინების გადაცემის ცერემონიაზე დამსწრე საზოგადოებას სიტყვით მიმართა საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის მინისტრმა ეკატერინე ტიკარაძემ.
გიორგი გახარიამ და ეკატერინე ტიკარაძემ რამდენიმე დევნილ ოჯახს სიმბოლურად ახალი ბინების გასაღებები პირადად გადასცეს.
მთავრობის ადმინისტრაციის პრესსამსახური