2015-09-04
.jpg&im_new_w=450)
საქართველოს პრემიერ-მინისტრ ირაკლი ღარიბაშვილის ხელმძღვანელობით, მთავრობის ადმინისტრაციაში მთავრობის სხდომა გაიმართა. მინისტრთა კაბინეტმა დღის წესრიგით გათვალისწინებული 40 საკითხი განიხილა. დღის წესრიგი
მინისტრთა კაბინეტმა მხარი დაუჭირა „მეფუტკრეობის სასოფლო-სამეურნეო კოოპერატივების მხარდაჭერის სახელმწიფო პროგრამის” დამტკიცების შესახებ საქართველოს მთავრობის დადგენილების პროექტს. პროექტის თანახმად, საჯარო სამართლის იურიდიული პირი - სასოფლო-სამეურნეო კოოპერატივების განვითარების სააგენტო, პროექტის ფარგლებში დაწესებული წინაპირობების დაკმაყოფილების შემთხვევაში, დაინტერესებული კოოპერატივებისათვის უზრუნველყოფს სკების შეძენას და ტექნიკურ მხარდაჭერას. კერძოდ:
1. პროგრამის ფარგლებში თითოეული მონაწილისათვის განხორციელდება კანონმდებლობით დადგენილი წესით სკების გადაცემა მისი ღირებულების 30%-ის ოდენობით.
2 მონაწილეებს გადაეცემათ მათ ბალანსზე არსებული სკების იდენტური რაოდენობა, მაგრამ არაუმეტეს 100 ცალი.
3. სააგენტო უზრუნველყოფს როგორც კოოპერატივის ბალანსზე რიცხული, ისე ამ პროგრამის ფარგლებში კოოპერატივისათვის გადაცემული სკების აღრიცხვა/რეგისტრაციას.
4. მონაწილე მიიღებს ტექნიკურ დახმარებას (კონსულტაცია) „თაფლის შესახებ ტექნიკური რეგლამენტის დამტკიცების თაობაზე“.
დღევანდელ სხდომის გადაწყვეტილებით, საქართველოს მთავრობასა და „ხუდონჰესის“ განმახორციელებელ ინვესტორ კომპანიას „ტრანს-ელექტრიკას“ შორის, 2011 წელს გაფორმებულ მემორანდუმში ცვლილებები შევიდა. ცვლილების თანახმად, ინვესტორი კომპანია ვალდებულია ხუდონჰესის მიერ გამომუშავებული ელექტროენერგია, ნაცვლად წელიწადის 3 თვისა (რაც შეადგენდა ხუდონის მიერ გამომუშავებული ელექტროენერგიის 10%-მდე), მთელი წლის განმვალობაში დატოვოს საქართველოში. შესაბამისად, ხუდონჰესის მიერ გამომუშავებულ მთლიან ელექტროენერგიას (ხუდონის მიერ გამომუშავებული ელექტროენერგიის 100%) მოიხმარს საქართველოს მოსახლეობა.