2021-01-25
სახელმწიფო სამედიცინო ჰოლდინგის ბაზაზე, „აკადემიკოს ნიკოლოზ ყიფშიძის სახელობის ცენტრალურ საუნივერსიტეტო კლინიკაში" (თბილისის რესპუბლიკური საავადმყოფო) ახალი კოვიდგანყოფილება გაიხსნა, რომელიც 400 პაციენტს მოემსახურება. განყოფილება უახლესი სამედიცინო ტექნიკითაა აღჭურვილი.
✅ პროექტის ღირებულება 8 მილიონი ლარია და ის სახელმწიფო სახსრებით განხორციელდა.
✅ ინტენსიური თერაპიისა და რეანიმაციის კოვიდგანყოფილება ელექტრო- და მექანიკური სამედიცინო საწოლებით, ჟანგბადის კონცენტრატორებითა და სუნთქვის კრიტიკულ-გადაუდებელი აპარატებითაა აღჭურვილი. კლინიკაში სრულად აღჭურვილი 200 რეანიმაციული საწოლია, რომელსაც თებერვალში კიდევ 200 დაემატება.
✅ გარდა ამისა, თბილისის რესპუბლიკურ საავადმყოფოს დამატებით სამი ერთეული ჟანგბადის დანადგარი დაემატა, რაც პაციენტებისთვის ჟანგბადის უწყვეტ და ცენტრალიზებულ მიწოდებას უზრუნველყოფს.
✅ 2020 წელს მნიშვნელოვნად გაძლიერდა სამედიცინო ინფრასტრუქტურა:
- აღიჭურვა და გაიხსნა ბათუმის რესპუბლიკური და რუხის მრავალპროფილური საავადმყოფოები;
- დასრულდა 341 სოფლის ამბულატორიული ცენტრის მშენებლობა და რეაბილიტაცია;
- გაიხსნა სასწრაფო სამედიცინო დახმარების 26 ადმინისტრაციული შენობა;
- სასწრაფო დახმარების ავტოპარკი განახლდა 140 ავტომობილით;
- სოფლის ექიმები აღიჭურვნენ 900-ზე მეტი კომპიუტერით, 400 ამბულატორიას გადაეცა სამედიცინო ინვენტარი;
- ჰოსპიტლების გაძლიერებისთვის სახელმწიფოს მიერ, ასევე დონორების მხარდაჭერის ფარგლებში, შესყიდულია აღჭურვილობა, მათ შორის, მაღალტექნოლოგიური სამედიცინო აპარატურა, რეანიმობილები, ინდივიდუალური დაცვის საშუალებები და სხვა საჭირო ინვენტარი.