2010 წლის 24 მაისს საქართველოს პრემიერ-მინისტრის პრესსამსახურის უფროსმა ნიკოლოზ მჭედლიშვილმა განცხადება გააკეთა:
„ადგილობრივი არჩევნების თარიღის მოახლოებასთან დაკავშირებით პრემიერ-მინისტრმა გადაწყვიტა მოსახლოებისათვის და სახელმწიფო მოხელეებისათვის მიემართა, რომ წინასაარჩევნო პროცესში და არჩევნების დღეს დემოკრატიული, თავისუფალი და თანასწორი გარემო იყოს უზრუნველყოფილი.
იმისათვის, რომ მოსახლეობამ იცოდეს - მთავრობა არ დაუშვებს ზოგიერთი სახელმწიფო ჩინოვნიკის მიერ წინასაარჩევნო კამპანიის დროს და ხმის მიცემისას ზეწოლის მცდელობებს, გაკეთდა ვიდეო რგოლი, სადაც პრემიერ-მინისტრი მოსახლოებას მიმართავს.
ამ ვიდეო რგოლში ნიკა გილაური ხაზს უსვამს რამოდენიმე მომენტს, რომელიც კანონით ისჯება:
• არჩევნებში მონაწილე კანდიდატებზე ზეწოლა, კანდიდატურის მოხსნის მიზნით.
• ამომრჩევლის ხმის სანაცვლოდ გასამრჯელოს დაპირება.
• ამომრჩევლის მოტყუება თითქოს ხმის მიცემის ფარულობა არ იქნება დაცული და გადამოწმდება ვინ ვის მისცა ხმა.
• ხელმძღვანელების მიერ თანამშრომლებზე მუქარა ან ზეწოლა რომელიმე კანდიდატის სასარგებლოდ ან საწინააღმდეგოდ.
• ამომრჩევლების ხმების სანაცვლოდ მათი ახლობლების საპატიმრო ადგილებიდან გამოშვების დაპირება
• არჩევნების შედეგების, საარჩევნო დოკუმენტების რაიმე ფორმით გაყალბება ან საარჩევნო პროცესის ჩაშლა.
ნიკა გილაურის განცხადებით, ეს არჩევნები უნდა გახდეს კიდევ ერთი წინგადადგმული ნაბიჯი საქართველოს დემოკრატიული განვითარების გზაზე."
პრემიერ-მინისტრის პრესსამსახური