2008 წლის 27 აგვისტოს საქართველოში ამერიკის შეერთებული შტატების საელჩოში პრემიერ-მინისტრი ვლადიმერ გურგენიძე და აშშ-ს დელეგაციის ხელმძღვანელი, სახელმწიფო მდივნის მოადგილე ბიზნესის, ეკონომიკისა და სოფლის მეურნეობის საკითხებში რუბენ ჯეფრი მასმედიის წარმომადგენლებს შეხვდნენ.
საქართველოს პრემიერ-მინისტრი მიესალმა ამერიკის დელეგაციას და აღნიშნა, რომ 11 აგვისტოდან საქართველოსა და აშშ-ის მთავრობებს შორის მიმდინარეობს დიალოგი ეკონომიკური დახმარების შესახებ. მისი თქმით, ანალოგიური პროცესი მიმდინარეობს ევროპელ მეგობრებთანაც.
როგორც ვლადიმერ გურგენიძემ აღნიშნა, ამერიკელ პარტნიორებთან განხილულ ძალზედ მნიშვნელოვან თემებს წარმოადგენს ინფრასტრუქტურის აღდგენა და რეაბილიტაცია, ლაპარაკია მთელ რიგ ღონისძიებებზე, რომელიც ხელს შეუწყობს საქართველოს ინტეგრირებას განვითარებული ეკონომიკის მქონე სამყაროსთან.
,,აღსანიშნავია, თუ როგორი გამძლეობის მაღალი ლიმიტი აღმოაჩნდა საქართველოს ეკონომიკას, რომელმაც მიუხედავად ბოლო ორი კვირის ვითარებისა იფუნქციონირა ძალიან მაღალ დონეზე და ასევე გააგრძელებს ფუნქციონირებას. უმთავრესი არის ის, რაც ჩვენმა ეკონომიკამ უჩვენა ბოლო ორი კვირის განმავლობაში - ელასტიურობა, გამძლეობის მაღალი ლიმიტი და დინამიზმი, რაც არის თავისუფალი საბაზრო ეკონომიკის ნიშან-თვისება", - განაცხადა პრემიერ-მინისტრმა.
საქართველოს მთავრობის კანცელარიის პრესცენტრი